Governu Nova Zelandia liu husi sira nia embaixada iha Timor-Leste fasilita treinamentu hasa’e kapasidade ba treinadores sira husi Sentru Formasaun Profesional Don Bosco, Dili kona ba tekniku konstrusaun dalan.
Embaixador Nova Zelandia iha Timor –Leste, Jonathan Schwass, hateten tinan oin mai sira sei lori treinador espesialista husi Nova Zelandia mai Timor-Leste atu fo formasaun ba treinador sentru formasaun Dom Bosco kona ba tekniku konstrusaun iha tempu badak.
Nia haktuir, programa ida ne’e servisu hamutuk ho Sekretario Estado Politika Formasaun Profesional e Empregu, Internasional labour Organization (ILO) oras ne’e dadaun iha hela prosesu avaliasaun ba treinador sira.
“Kursu ne’e sei fo ema barak ne’ebe mak servisu iha konstrusaun dalan atu aprende tekniku husi espesialista sira,” Embaixador Schwass hateten, iha knar fatin Motael, Dili.
Nia hatutan, antes sira halo diskusaun ho governu Timor –Leste liu husi SEPFOPE, Sekretario Estado Apoiu Seitor Privado (SEAPRI) no ILO husu atu governu Nova Zelandia fo asistensia iha setor infra-estruktura tanba setor ida ne’e sai aktividade bo’ot iha Timor –Leste.
Iha parte seluk, Diretor Jeral Sekretario Estado Politika Formasaun Profesional e Empregu (SEPFOPE), Jacinto Gusmão Barros, hateten iha area konstrusaun iha ona estandar kualifikasaun maibe atu garantia nia kualidade presiza hasa’e treinador sira nia kapasidade.
Nia hatutan, Asian Development Bank (ADB) liu husi SEPFOPE apoiu ona edifisio no ekipamentus kompletu, tanba ne’e atu transforma ba iha formadu sira treinador sira presiza iha konesementu uluk.
“Ekipamentus kompletu ona ita presiza hasa’e diak liu tan ita nia trienador sira nia kapasidade atu bele transforma fali ba iha ita nia alin oan sira ne’ebe buka formasaun iha area konstrusaun nian,” DJ Barros hateten.
Alende area konstrusaun, nia dehan, sira mos halo ona kordenasaun ho governu Australia atu hasa’e mos kapasidade treinador sira nian iha area automotif liu –liu sertifikadu III no IV nian.
