Ministeriu Saude monta Air Conditioning (AC) iha container 13 ne’ebe rai aimoruk ba, nune’e aimoruk iha container labele at.
Diretor Nasional Apoiu Servisu Ospitalar no Enkaminamentu Ministeriu Saude (MS), Horacio Sarmento da Costa, hateten aimoruk tau deit iha container laran, tanba armajen Servisu Autonomo Medikamentu no Ekipamentu da Saude (SAMES) la sufsiente ona.
“Armajen SAMES laiha espasu, entaun ami halo instalasaun AC ba 13 kontainer ne’ebe apoiu husi WFP, maibe ida ne’e mos la sufsiente nafatin, ami buka tan fatin atu aluga,” Diretor da Costa hateten, iha Kaikoli, Dili.
Nia haktuir, durante fulan rua (Junu-Julhu 2014), kompania Kimia Farma hatama tan aimoruk container 28, maibe fatin mak laiha.
Iha sorin seluk, Vise Ministra Saude Apoiu Jestaun e Rekursu Humanu, Maria do Ceú Sarmento Pina da Costa, rekonese failansu ida ne’e, maibe sira sei koko resolve iha tempu badak.
“Tanba iha aimoruk balun mak tenke iha suhu 25c (derajat celcius).Tinan ida ne’e ami hadia armajen tuan, no halo rehabilitasaun ba armajen ne’ebe WFP fo iha Bebora nian, nune’e bele rai aimoruk iha ne’eba,” nia dehan.
Nia garantia komunidade sei la halerik ba aimoruk hanesan fulan hirak liu ba tanba stok aimoruk ne’ebe iha sei garantia to’o fulan Marsu tinan oin 2015 no iha items balun mak iha hela prosesu kompras.
Entretantu Membru Parlamentu Nasional, Deputadu Leonel Marçal, konsidera Ministerio Saude la iha planu ne’ebe diak atu kompras aimoruk.
Tanba tuir nia, aimoruk ne’ebe sosa ho orsamentu 2013 nian, kompania hatama fal iha 2014 ho kuantidade ne’ebe bo’ot tebes, enkuantu orsamentu 2014 nian ba kompras aimoruk, maibe iha prosesu tenderizasaun hela.
Membru Komisaun F (Saude, Edukasaun, Veteranus, Igualidade) ne’e mos dezafia prosesu distribuisaun ba aimoruk tanba pesoal SAMES mos limitado inklui mos transporte ne’ebe menus prekupa.
“Ami nia prekupasaun aimoruk ida resin tinan oin bele distribui hotu ona ba distritu ka tinan oin mai ita rona fali katak sunu aimoruk tan,” Deputadu Marcal hateten.
