Joven nian 15 reprejenta husi sentru joventude nen no Fundasaun Fundef hetan oportunidade tuir formasaun no estudu komprativu iha Jogjakarta Indonesia durante semana rua.
Diretor Caritas Australia, Fernando Pires hateten nudar doadores iha obrigasaun atu kapasita no hametin organizasaun parseirus sira intermus rekursu humanu no finanseiru hodi responde ba ejijensia nasaun nian liu –liu joven sira.
“Atu sira aumenta tan sira nia kapasidade nudar jestor sentru joventude sira no oinsa dezain programa ka atividade hodi responde ba iha nesesidade no ejijensia joventude sira nian,” Dehan Diretor Pires bainhira halo despedida ho Joven sira iha servisu fatin Bebora Dili.
Nia hatutan dificuldade ne’ebe organizasaun joventude sira infrenta durante ne’e mak rekursu finanseirus tanba ne’e formasaun ida ne’e ajuda tebes sira atu trasa planu estrategiku ida forte hodi atrai dodores sira.
“Hua espera ho oportunidade sira ne’e sentru joventude sira no Fundef bele iha estrategia no politika aktividade ba joven ne’ebe responde duni ba joven sira nia nesesidade,” nia espera.
Partisipantes sira ne’e husi sentru joventude distritu Viqueque, Ermera, Aileu, Lospalos, Oecusse inklui mos fundasaun Fundef ne’ebe durante ne’e fo formasaun acountabilidade no administrasaun inklui mos lingau ba jovens sira iha Distritu Dili.
Alende formasaun partisipantes sira ne’e mos sei ba vizita sentru joventude sira iha Jogjakarta hodi hare besik sira nia servisu hanesan referensia ida ba sira atu implementa iha Timor –Leste hodi responde ba ejijensia joven sira nian.
Entertantu, Konseilho Joventude Distritu Viqueque, Clotilda Teresa Soares Guterres agradese tanba Caritas Australia fo ona oportunidade ida ne’e ba sira atu kapasita an hodi hametin organizasaun.
Nia haktuir materia sira ne’ebe sei ba aprende iha ne’eba lases husi servisu ne’ebe durante ne’e sira halo ona maibe importante tebes rona tanba materia bele hanesan maibe metrologia implementasaun bele diferente.
“Ami fiar katak oportunidade ida ne’e sei la monu let deit ami sei aproveita didiak aprende buat ruma atu hametin ami nia organizasaun no dezenvolve diak liu tan hodi responde ba ejijensia joventude sira nian,” dehan Soares.
Iha parte seluk, Konseilho Juventude Distritu Aileu, Victor Nascimento de Araújo promete oportunidade ida ne’e sei la sai benefisio pesoal maibe sei sai benefisio ba juventude sira iha area remotas mos liu –liu distritu Aileu nian.
“Oportunidade ida ne’e sei la sai benefisio ba pesoal maibe oportunidade ne’e sei sai mos benefisio ba joven sira ne’ebe oras ne’e dadaun hein hela rezultado formasaun no estudu komparativu ida ne’e,” dehan Nia.
