Vise Ministru Komersio Industria e Ambiente (MCIA), Abel da Costa Ximenes, hateten governu labele halo intervensaun direita ba presu sasan iha merkadu, tanba sira selu taxa ba estadu.
Nia hatutan, emprejario ida-idak iha direitu atu determina presu ba sira nia sasan, tanba sira determina presu mos bazeia ba iha kustu de importasaun, kustu trata dokumentus hatama sasan no seluk tan.
“Ita nunka bele halo uniformidade folin sasan iha merkadu, tanba sasan ema fa’an ne’e ida-idak nian, la’os governu nian,” Vise Ministru Ximenes hateten, iha Sentru Konvensaun Dili.
Nia haktuir, governu so iha obrigasaun atu fo kapasitasaun ba emprejario sira hanesan mikro ki’ik, koperativas kona ba oinsa halo negosio inklui mos ajuda grupu koperativas sira trata dokumentus no seluk tan.
Iha parte seluk, konsumedores Agostinha da Costa, hateten governu iha obrigasaun atu kontrola folin sasan liu –liu nesesidade baziku iha merkadu, tanba fo impaktu ba povu ki’ik sira ne’ebe laiha kbi’it.
“Tanba realidade hatudu, katak sasan iha loja ida ho ida seluk folin diferente, maske sasan hanesan,” nia hateten.
Maske emprejario sira selu taxa, maibe nia dehan, governu iha dever atu kontrola folin sasan iha merkadu no loja sira.
“Sasan hanesan supermi, mina bimoli sira nia folin la hanesan iha merkadu, balun karun liu fali,” nia kestiona.
Entertantu Jose do Carmo Pinto, nudar emprejariu ki’ik ida husu kapasitasaun ba governu ba grupo protudor no emprejario local sira kona ba oinsa determina folin sasan iha merkadu.
“Atu garantia ita nia kompetisaun iha merkadu, tanba Timor adopta sistema merkadu livre,” nia sujere.
