Sekretariu Estadu Agua, Saneamentu no Urbanizasaun, Elias Pereira Moniz, hateten dadaun ne’e komunidade suku neen iha capital Dili hahu selu ona tarifa bee moos.
Suku neen hirak ne’e, nia dehan, mak hanesan suku Becora, Bemori, Kampo Alor, Fatuhada, Mascarenhas, Surik Mas no Comoro balun.
Nia hateten, iha suku Comoro ba to’o iha tasi tolu, iha fulan Agostu ne’e bele intrega ona ba komunidade para selu ona, tuir fali mai area Bidau Santana ho Area Branca.
“Ami nia ekipa teknik esforsu an nafatin hadia kanu sira ne’ebe mak at iha bairo-bairo, para komunidade ne’ebe mak la asesu bee moos ne’e bele asesu hotu,” SE Moniz hateten, iha merkadu Taibesi, Dili.
Kona ba prosesu selu, nia dehan, komunidade sira sei selu tuir nia kontador deit, tanba kontador mak halai e selu direitamente iha banku.
Iha parte seluk Xefe Departementu Abastesimentu Agua Distritu Dili, Florindo de Jesus, hateten oras ne’e dadaun sira nia parte foka liu ba kanu sira ne’ebe mak kuak hodi hadia hotu.
Maibe nia mos lamenta ho attitude komunidade balun ne’ebe buka estraga kanu, koa kuak tiha kanu.
“Tanba ne’e mak komunidade balu sei halerik bee mos, ne’ebe ami tekniku buka meius atu hadia hotu,” nia dehan.
Iha fatin seluk komunidade Mascarenhas, Januario Fernandes, hateten sira pronto atu selu, maibe bee tenke sai estabil.
“Bee ami selua duni, ita selu tuir ita nia kontador, loron ida uja hira,” nia dehan.
