Organizasaun Judicial System Monitroing Programme (JSMP), sujere ba Ministeriu Justisa atu kria fatin julgamentu movel ne’ebe seguru, liu-liu ba kazu sensitive sira hanesan violasaun seksual hasoru menoridade.
Diretor Ezekutivu JSMP, Luis Oliveira Sampaio, hateten presiza fatin ne’ebe seguru, nune’e vitima sir abele hato’o sira nia depoitmentu ho seguru mos.
“Iha tinan kotuk ami observa iha Maliana kazu violasaun seksual hasoru menor, sira loke ba publiku ema haree no ema basa liman wainhira vitima fo kesaksian, ne’e tuir lolos labele,” Diretor JSMP Sampaio preokupa.
Nia kestiona, tanba dala barak julgamentu movel hala’o iha salaun polisia no administrasaun nian, ne’ebe publiku bele asesu.”Governu tenke kria fatin espesifiku hodi uja ba julgamentu movel ba kazu sensitive sira,” nia sujere.
Iha fatin seluk Deputada Albina Marcal, hateten julgamentu movel ba kazu sensitive hanesan violasaun seksual la fo vantajen ba ba vitima sira.
“Hau apoia JSMP nia hanoin hodi husu governu kria fatin espesifiku hala’o julgamentu movel, governu tenke toma atensaun, ” nia hateten.
Alende ne’e,nia mos konkorda ho julgamentu movel ne’e, tanba bele ajuda komunidade sira ne’ebe hela iha area rural. “Sira la presiza hasai osan hodi to’o iha tribunal distrital, maibe bele julga deit iha sira nia suku laran,”.
Hatan ba preokupasaun ne’e Ministru Justisa Dionisio Babo, hateten antes julgamentu movel ne’e la’o, husi parte miniteriu halo ona akordu ho autoridade lokel atu oferese fatin.
“Sira mak fo fatin hanesan iha sede suku no fatin ne’ebe premiti hodi halo julgamentu ne’e,” Ministru Babo hateten.
Tanba ne’e, nia dehan, governu laiha nesesidade atu kria fatin ba halo julgamentu movel.“Tanba halo tiha julgamentu, sira fila fali ona,”.
Konaba kazu sensitive ne’ebe julga ho tribunal movel maibe la taka ba public, Babo rejeita no dehan ne’e la loos, tanba wainhira julga kazu sensitive sempre taka ba public.
“Kazu sensitive ruma, sira julga iha fatin ne’ebe taka, sira tuir nafain prinsipiu ne’ebe iha tribunal nian,” Ministru Babo hateten.
