Membru Parlamentu Nasional husu ba Ministeru Obras Publiku (MOP), atu hadia estrada Likidoe iha sub-distritu Aileu, distritu Aileu.
Membru Komisaun E (infrastrutura, telekomunikasaun), Deputadu Inacio Moreira, hateten suku Likidoe iha produtu local ne’ebe pontesial tebes, maibe wainhira atu lori mai Dili sempre hetan difikuldade tanba estrada a’at.
“Oinsa nusa mak produtu ne’e bele mai iha Dili, sei kuandu estrada ne’e a’at nune’e,” Deputadu Moreira kestiona, ia Parlamentu Nasional.
Asuntu ida ne’e, nia dehan, dalabarak ona deputadu sira levanta iha plenaria, maibe governu nunka toma atensaun.
“Governu kontinua la rona, hodi hadia” nia hateten.
Nia hatutan, kondisaun estrada mak kontinua a’at bebeik hanesan ne’e, produtu local ne’ebe komunidade sira produs, hodi ba han deit, maibe atu compete iha nivel komersiu ne’e susar.
“ita sempre kolia atu ita nia produtu local ne’e bele valor mos iha merkadu, maibe ita la kria kondisaun,” Deputadu Moreira dehan.
Hatan ba preokupasaun ne’e Sekretariu Estadu Obras Publiku (SEOP), Luis Vas Rodrigues, hateten Ministeriu Obras Publiku (MOP) iha orsamentu manutensaun rutina nian hodi halo mos estrada rural iha distritu.
“Talves Likidoe tama ona iha prioridade, konserteza sira sei halo,” nia dehan.
Nia mos hateten aliende uja osan manutesaun MOP nian, iha mos akordu ho governu Australia liu husi ausaid hodi hare mos ba estrada rural ne’ebe presija toma atensaun.
“Ne’ebe ami hamutuk hodi hare ba estrada rural sira ne’e,” SE Rodrigues dehan.
