Membro Parlamentu Nasional husu ba Polisia Nasional Tranzito (POLTRANS) atu mantein hodi kontrola movimentu iha estradas, tanba motoristas barak halai la tuir sinais tranzito ne’ebe iha.
Prezidente Komisaun B (defesa, seguransa no negosiu estrangeirus), Deputadu David Dias Ximenes, hateten motorista barak mak halai tuir sira nia hakarak deit.
“Lampu kuning mos motorista halai nafatin, ida ne’e bele fo impaktu ba komunidade sira la’o ain no soke ema ne’e iha dalan kurva,” Deputadu Ximenes hateten, iha Parlamentu Nasional.
Alende ne’e nia dehan, motorist barak mak seidauk iha konesementu diak kona ba sinais tranzito ne’ebe iha.
“Dala barak ema la’o hela iha linha zebra cross mos kareta sei tama nafatin e sira mos la hatene no kona ba lampu tranzito verde ne’e saida, mean ne’e saida no amarelho ne’e saida,” Deputadu Mandati ne’e preokupa.
Tanba ida ne’e, nia husu ba POLTRANS atu mantein iha estrada ibun nune’e bele kontrola motorist sira ne’e.
“Kontra sinais tranzito ne’e tenke kaer, multa kedas para sira mos tauk,” nia sujere.
Preokupasoens hanesan mai husi komunidade Mateus Fernandes, katak motorist barak mak seidauk hatene kona ba sinais tranzito ne’ebe iha durante ne’e.
“Asidente trafiku barak liu ne’e iha linha zebra cross no iha kurzamentu,” nia preokupa.
Tanba ne’e “ami husu polisia tranzito tenke mantein nafatin iha estrada ibun para haree kareta ho motor sira ne’ebe halai nakar ne’e,”.
Iha parte seluk Komadante Operasaun, Superintendent Xefe Armando Monteiro, hateten POLTRANS hamutuk ho Diresaun Nasional Transporte e Terestre (DNTT) halo bebeik sosializasaun kona ba lei tranzito nian ba motorist sira.
“Ami sosializa iha 2006 bainhira hetan promulga no aprovasaun, hahu husi nivel nasional to’o nivel sub-distritu, e agora ami tama ona ba suku ho aldeia esplika kona ba lei kodiku estrada nian,” nia dehan.
Alende ida ne’e, nia hateten, sira mos ba visita eskola hotu-hotu, para estudante sira mos bele hatene kona ba lei kodiku Estrada nian no estudante sir abele ba esplika tutan ba inan ho aman sira, maneira hodi sosilizasaun lei kodiku Estrada liu husi dialog, seminario, involve autoridade local no orginzasaun naun governmental.
