Conselho Nasional Joventude Timor Leste (CNJTL) servisu hamutuk ho Embaixada Japaun iha Timor-Leste haruka joventude nain 14 ba halo estudu komparativu iha Japaun kona ba ambiente nian.
Prezidente CNJTL, Leovigildo Hornai, hateten joventude nain 14 ba Japaun, tanba hetan fiar husi embaixada Japaun iha Timor-Leste.
“Sira fila husi Japaun, sira iha rezultadu duni e balun hamutuk ho hau iha CNJTL no balun fo kursu fali ba jovens sira seluk,” Hornai hateten.
Tanba nia dehan, durante iha Japaun aprende kona ba limpeza, oinsa mak moris iha ambiente ne’ebe moos. “Sira fila husi Japaun, sira hala’o atividade ida iha komunidade sira nia le’et, halo limpeza iha bairu,” nia hateten.
Entretantu Osorio da Costa, hanesan joventude ne’ebe hola parte iha estudu komparativu ne’e, hateten durante iha Japaun, la’os aprende deit kona ba limpeza, maibe mos kona ba teknolojia computer nian.
“Ami iha ne’e hamutuk ho maun balun hanorin kona ba computer no lian ingles no ida ne’e mak durante ne’e ami aprende,” nia dehan.
