Organizasaun Fundasaun Mahein ne’ebe durante ne’e observa ba iha area seguransa no defeza iha rai laran, konsidera servisu Polisia Investigasaun Kriminal ba kazu omisidu sira neneik liu, liu-liu kazu Bebora ne’ebe involve AJ to’o agora seidauk iha solusaun.
Vise Diretor Fundasaun Mahein (FM), Joao Almeida, hateten suspeitu AJ rasik, kondenadu ho krimi omisidu grave, tanba oho vitima ST ne’ebe nudar nia doben ho fiu catok fuuk nian, bobar iha vitima nia kakorok no sona vitima nia kabun to’o mate.
“Investigasaun ba kazu ne’e neneik liu no la hatene los nia prosesu ne’e to’o ona iha ne’ebe,” Vise Almeida preokupa via telefone.
Nia konta, kazu ne’e rasik akontese iha tinan kotuk (4 Setembru 2013), maibe to’o agora seidauk iha informasaun klaru kona ba prosesu investigasuan ba kazu refere.
Kuandu situasaun ne’e mantein nafatin, nia dehan, ida ne’e bele hamonu publiku nia fiar ba Polisia Nasional Timor Leste liu –liu iha area Servisu Investigasaun Kriminal.
“Bele mos fo fatin ba autor krime sira seluk hodi nafatin halo krime,” nia dehan.
Hatan ba kestaun ne’e Komandante Ezersicio, Inspektor Xefe Manuel Alves, katak prosesu ne’e pendente hela, tanba suspeitu sei moras hela no seidauk rekopera to’o agora.
Nia informa, iha fulan Maiu liu ba suspeitu konsege alta ona husi Ospital Nasional no SIK atu submete ba prosesu investigasaun, maibe suspeitu nia kondisaun grave fila fali.
“Ita investiga arguido tenke ho kondiasaun saude ne’ebe diak, no prosesu investigasaun tenke halo iha polisia,” Inspektor Xefe Alves hateten.
