Kada tinan estadu apoia orsamentu subvensaun publiku ba kada Partidus Politiku iha Parlamentu Nasional no tinan ida ne’e estadu aloka tan ba Parpol sira.
Membru Komisaun Nasional ba Eleisoens (CNE), Komisaria Joana Dulce Vitor, hateten apoia orsamentu ne’e ho objetivu atu partidus ida-idak bele hala’o sira nia aktividades partidus nian iha baze.
Komisaria Vitor, hateten iha orsamentu jeral de estadu Comisaun Nasional ba Eleisoens nian tau osan iha verbal transferensia publiku hodi oferese ba kada partidu.
“Balun uja halo sira nia sede, selebra partidu nia loron sira bele uja osan ne’e,” Komisaria Dulce Vitor hateten.
Nia dehan, orsamentu subvensaun publiku ne’e desde kedas tinan 2010, hamutuk $1 miliaun, iha tinan 2011 hamutuk $3 mil, iha 2013 $5 mil no iha 2014 ne’e kada partidu : Partidu Frente Mudansa $184,615.38, Fretilin $2,307,692,31, no Partidu CNRT $2,769,230.77.
“Kada kadeira mais umenus hetan 65 mill pur kada ano,” Komisaria Vitor hateten.
Nia dehan,CNE mos halo monitorizaun ba osan ne’ebe alokadu, wainhira partidu utiliza la tuir nia dalan husi parte CNE iha dever atu hapara osan refere. “durante ne’e sira uja osan tuir nia dalan duni,” nia dehan.
Enkuantu Deputadu Eladio Faculto husi bankada Fretilin, hateten osan ne’e uja atu dinamiza informasaun no lori organizasaun kontinua eziste liu husi aktividade ne’ebe trasa ona.
“Planu no programa ne’ebe internal partidu nian atu konsolida ou atu habelar tan politika demokrasia,” Deputadu Faculto hateten.
Alende ne’e, nia dehan, osan ne’e bele uja ba konsolida atu organiza membrus iha distritu, sorumutu ho militants halo konferensia nasional.
“Depois halo tiha aktividades, tenke hatama relatoriu ba CNE,” Deputadu Faculto dehan.
Iha parte seluk Deputadu Arao Noe husi bankada Congresu Nasional Rekonstrusaun de Timor (CNRT), hateten Parlamentu aprova osan ne’e hodi nune’e governu bele fo atensaun ba existensia partidu nian.
