Membru Parlamentu Nasional preokupa ho kondisaun estrada nasional suku Ailo Lalang to’o sub-distritu Fatuberliku, distritu Ainaro,ne’ebe grave tebes.
Deputadu Manuel Salsinha, hateten komunidade suku Ailo Lalang iha produtu lokal barak, maibe labele lori mai iha capital Dili, tanba Estrada at.
“Uluk Ministru Obras publik rasik mak dehan iha ona komphania ida atu kaer obra ne’e, maibe to’o agora rezultadu laiha,” Deputadu Salsinha hateten, iha Parlamentu Nasional.
Tanba ne’e, Deputadu ne’e husu ba Ministru Obras Publik haruka tekniku ba haree ho matan kondisaun estrada ne’e hodi bele foti medida ne’ebe adekuadu.
Hatan ba preokupasaun ne’e Ministru Obras Publik Gastao de Sousa, hateten estrada ne’e agora dadaun tama ona ba faze dezenhu detaliadu.
“Depois mak ita haree nia orsamentu ne’e oinsa, tanba hau sei bele bo’ok an se kuandu iha orsamentu iha fundu infra-estrutura,” Ministru Gastao hateten.
Iha parte seluk komunidade Agusto Pereira, hateten estrada ne’e kuandu iha tempu bailoron rai rahun barak tebes, no tempu udan at liu.
“Tanba be’e halo dalan ne’e la’o labele, no ba motorista sira senti tauk atu lori kareta no motor,” Pereira dehan.
