Membru Parlamentu Nasional ejiji Ministerio Solidaridade Sosial atu halo investigasaun ba sira nia pontu vocal ne’ebe kaer programa bolsa da mae iha sub-distritu Oesilo, distritu Oe-Cusse, tanba identifika labarik balun sai ona husi eskola, maibe kontinua simu subsidio kada fulan.
Membru komisaun F (saude, edukasaun, kultura, veteranus no igualdade jeneru), Deputadu Leonel Marçal, hateten informasuan hirak ne’e nia parte simu husi responsavel edukasaun iha sub-distritu Oesilo inklui administrador rasik bainhira halo fiskalizasaun iha fatin ne’eba.
“Tenke halo investigasaun ba ninia pesoal sira, karik iha faktus no provas, tenke levanta ba KAK atu halo investigasaun klean,” Deputadu Marcal ejiji, iha Parlamentu Nasional.
Tuir nia, problema ne’e mosu, tanba koordenasaun servisu entre lina ministerial mak faila liu –liu Ministerio Solidaridade Sosial nudar implementador no Ministerio Edukasaun.
Nia dehan, politika ida ne’e atu apoia povu kbi’it la’ek nia oan sira ne’ebe iha prestasaun diak hodi kontinua sira nia estudu, maibe tenke tuir regras, tanba ne’e osan estadu nian.
Tanba ne’e nia husu ba Ministerio Solidaridade Sosial tenke haree no verifika dadus didiak, tanba la’os deit iha , maibe iha fatin balun mos subsidio bolsa da mae la to’o iha nia fatin lolos.
“Funsionario publiku sira nia oan mos hetan hotu subsidio hirak ne’e,” nia kestiona.
Hatan ba kestaun ne’e, Ministra Solidaridade Sosial (MSS), Isabel Amaral Guterres, hateten ministerio sei buka tuir benefisiariu sira ne’ebe la ba eskola ne’e.
“Ami rona ona ida ne’e e deputadu sira mos hakerek ona karta mai ami, tanba ne’e ami sei tun ba iha baze atu verifika fali dadus ida ne’e,” Ministra Guterres hateten.
Maibe, nia dehan, oras ne’e dadaun MSS seidauk bele foti desizaun ruma ba problema ne’e, presiza verifika informasaun sira ne’e, tanba programa bolsa da mae ne’e servisu hamutuk ho lideransa suku sira.
“Maibe karik pontu vocal MSS sira involve iha aktu ne’e, sei prosesa tuir lei ne’ebe vigor iha rai ne’e,” nia hateten.
