Tribunal Distrital Dili halo julgamentu ba kazu violensia domestika: tanba prepara etu maran, arguido TdS (la’en) baku lezada IR (fen kaben).
Iha julgamentu iha Tribunal Distrital Dili lezada IR, konfesa katak, iha altura ne’eba lezada osan laiha duni atu sosa modo, tan ne’e nia tein deit etu maran hodi prepara iha meja leten.
Nia konta, iha altura ne’eba mais umenus tuku 7:30 kalan arguido fila husi to’os, hodi loke tirina no haree deit etu maran, entaun nia husu modo.
“Hau dehan modo laiha, haree ba han deit ona ho aimanas,” lezada IR deklara iha Tribunal Distrital Dili (TDD).
Maibe, nia dehan, tanba arguido nervozu ho liafuan ne’e, arguido tama ba dapur no foti ai sanak hodi baku lezada nia kotuk laran dala tolu, no ulun dala ida.
“Hau ba kedas iha ospital hodi halo tratamentu,” IR hateten.
Entretantu iha julgamentu ne’e arguido TdS hili nonok, no ho nonok ne’e juis nota katak saida mak lezada IR koalia ne’e los hotu, tanba iha altura ne’eba arguido emosaun mak halo hahalok sira ne’e.
Enkuantu Advogadu Fernando Lopes, hateten arguido sente arepende tebes ho hahalok ne’ebe nia halo ba lezada no arguido jura ona ba tribunal, katak sei halo tan aktu ne’e.
Tanba ne’e, Advogadu Lopes husu ba tribunal atu aplika pena ne’ebe adekuadu ba arguido.
Ikus mai, depois de rona tiha deklarasaun husi lezada no advogadu, tribunal deside aplika pena administrasaun deit ba arguido TdS.
