Ministru Saude, Sergio da Costa Lobo, hateten ministeriu sai kria unidade mobile diagnostiku ida, fo atendimentu diagnostiku ba komunidade sira iha teritorio tomak liu –liu komunidade sira ne’ebe hela iha area remotas. 
Lobo rekonese, katak durante ne’e diagnostiku hotu sentraliza iha nasional no ospital referral sira hanesan ray-x, USG no seluk tan.
“Distritus ne’ebe do’ok sei iha unidade diagnostiku, lori iha kareta ida kompletu ho ray-x, ultrasaun, laboratorium atu haleu iha teritorio tomak, kada fulan fo atendimentu ba komunidade sira,” Ministru Lobo hateten, bainhira halao audensia publika iha Plenaria Parlamentu Nasional.
Iha tinan ida ne’e, nia dehan, sei instala unidade diagnostiku permanente iha distritu neen, nune’e bele atende komunidade sira, liu –liu inan isin rua sira.
“Rezultadu mak haruka mai iha medikus espesialista sira iha nasional liu husi internet atu halo analiza,” nia dehan.
Iha parte seluk, Deputada Olinda Morais, lamenta tebes ho servisu Ministerio Saude nian ,tanba atu halo deit USG mos inan isin rua sira tenke halai mai iha nasional.
Alende ne’e, nia mos lamantavel ho atendimentu diagostiku iha Ospital Nasional Guido Valadares (HNGV), tanba iha kazu balun mak sira hasai iha ospital nasional haruka fali nia rezultado ba iha klinika privadu sira atu analiza ho kustu ne’ebe bo’ot.
Entretantu, Deputadu Eladio Faculto, apresia ho inisativa ida ne’e, maibe tenke implementa duni, liu-liu ba povu sira iha area rural sira.
“Kria unidade diagnostika, la’os koalia deit, maibe tenke implementa e ami sei hare to’ok sira nia intensaun ba programa ida ne’e,” Deputado Faculto hateten.
