Tuir Monitorizasaun Ngo Belun liu husi programa ho naran Atensaun no Responde Sedu ba operasaun Membru Falentil Forsa defeza Timor –Leste (F-FDTL) no Polisia Nasional Timor Leste (PNTL) hatudu katak iha tinan Ida ne’e membru nain 17 mak involve iha krimi.
Director NGO Belun Luis Ximenes, afirma total 17 ne’e sura husi fulan januari to’o fulan Abril 2014, nune’e iha fulan januari to’o abril membru PNTL hamutuk nain 10, no membru F-FDTL hamutuk nain 7.
“Membru sira ne’e involve iha krimi ataka fisiku, hanesan baku, tuku no amiansa,” Director Ximenes esplika, foin lalais iha nia knar fatin.
Director Luis hateten, krimi ne’ebe involve Membru PNTL no F-FDTL akuntese barak liu iha distritu Dili.
“Tanba bazea ba keiza komunidade nian iha Dili barak liu,” dehan Director ne’e.
Relatoriu sira ne’e, nia dehan hato’o ona ba Secretariadu Estadu Seguransa, no Secretariadu Estadu Defeza atu nune’e bele foti medidas ne’ebe adikuadu ba nia membru sira ne’ebe involves iha krimi hirak ne’e.
Entretantu Presidente da Republika, Taur Matan Ruak ne’ebe hanesan mos Komandante Supremu ba PNTL no F-FDTL, rekonese hahalok Membru PNTL no F-FDTL hirak ne’ebe involve krimi.
“Presidente rejista kazu sira ne’e hotu e presidente sei husu komando PNTL no F-FDTL hodi buka hatene e buka solusoens ida ba problema sira ne’e,” dehan Presidente da Republika Taur Matan Ruak.
