Amu Bispu Diocese Baucau, Dom Basilio do Nacimento hateten igreja katolika la konkorda ho politika Ministerio Saude nian katak uza kondong hanesan solusaun efetivu atu kombate no prevene moras HIV/SIDA iha Timor –Leste tanba kondong laos solusaun. 
Nia rekuinese iha ema lubuk ida mak oras ne’e dadaun afetado moras at ne’e no moris terus maibe atu prevene virus ne’e daet ba ema seluk solusaun laos uza kondong maibe sosializasaun informasaun edukasaun seksual importante tebes tanba uza kondong bele mosu seksu livre iha rai laran.
“Solusaun ba SIDA mak uza kondong igreja katolika dehan lae ne’e imi bele bolu hau atrajadu mental to’o iha ne’ebe maibe uma kreda nia posisaun la sai husi ne’e sei iha dalan seluk mak edukasaun,” dehan Bispo Dom Basilio bainhira partisipa iha wokshop nasional ho religiosa sira kona ba hamutuk hapara transmisaun HIV/SIDA iha Igreja Hosana Bebora Dili.
Nia hatutan moras ida ne’e mosu laos deit biologiku maibe iha mos koponente barbarak hanesan politika, ekonomia komersial, influensia de interese no social.
Iha oportunidade ne’e Amu Bispo husu ba entidade hotu atu halo reflesaun ida ba moras ida ne’e tanba moras ne’e laos mosu husi lalehan mai no maromak mak kastigu maibe husi ema nia hahalok no kastigu an.
Iha fatin hanesan Presidente Conseilho Nasional Islamico do Timor -Leste, Dr. H Ahmad Ali Alamubi la konkorda mos ho politika uza kondong tanba la resolve problema maibe asegura ba halo pekadu.
“HIV/SIDA ne’e mai husi ema halo pekadu laos ema uza kondong atu hapara tanba husi ema halo pekadu ne’ebe la kesi ho sakramentu kaben tanba ne’e kondong ne’e la resolve problema,” Dehan Nia.
Entertantu, Xefe departamentu moras contagioza Ministerio Saude, Merita Monteiro hateten ida ne’e presepsaun religoza sira nian importante mak ho objetivu ida deit atu prevene moras ida ne’e husi populasaun tanba ne’e seitor saude iha mundu tomak inklui Timor –Leste rekomenda atu uza kondong hodi prevene moras ida ne’e.
“Ital abele hare husi parte ispiritual nian ne’e husik ba igreja mak hare ami hare husi parte saude nian tanba ne’e husi seitor saude laiha bandu ida atu utilize kondong,” dehna Monteiro.
Nia hatutan uza kondong la 100% prevene bainhira uza la tuir nia dalan maibe bele redus risku transmisaun virus ba ema seluk ho persentajen ki’ik tanba ne’e hanesan metologia efetivu ida atu prevene moras sira transmite husi relasaun seksual.
