Iha fiskalizasaun ne’ebe Komisaun F Parlamentu Nasional hala’o iha baze, deskobre katak alunus sira iha Eskola Ensinu Baziku Ulmera, distritu Liquisa lor-loron hala’o aprendizajen iha ambiente ne’ebe mak fo’er.
“Ami tesik ba eskola sentral bazika Ulmera, Liquisa ne’eba ita haree rai rahun kaer vidru sira ne’e tomak,” Prezidenti Komisaun F,Virgilio Hornai hateten, iha Parlamentu Nasional.
Prezidente Komisaun F (edukasaun, saude, kultura, veteranus no igualdade jeneru), ne’e lamenta tanba diretor da eskola ne’e la organiza malu hodi halo limpeza iha eskola ne’e.
“Diretor no profesor sira labele organiza estudante sira halo limpeza,” nia kestiona.
Entretantu Vise Ministra Ensinu Baziku, Dulce de Jesus Soares, katak kestaun ne’e Ministeriu Edukasaun (ME) koalia ona iha enkontru, atu eskola ida-idak hamoos sira nia eskola.
“Ami fo hatene ba ami nia profesor sira, atu tau matan ba kondisaun eskola ne’ebe sei minimu tebes,” Vise Soares hato’o.
Vise Ministra ne’e espera, katak ho Orsamentu Jeral Estadu (OJE) 2014 nian bele hadia diak liutan kondisaun eskola iha Timor laran hotu.
“Maibe ami mos husu ba profesor sira atu kreativu, bele hadia diak liutan sira nia eskola,” Vise Soares sujere.
