Sekretaria Estadu ba Promosaun Igualdade (SEPI), Idelta Maria Rodrigues, hateten SEPI iha ona planu atu harii sentru jeneru iha distritu hotu-hotu.
Nia dehan, Grupu Trabalhu Jeneru mak sai mata dalan oinsa para resolve problemas ne’ebe feto sira infrenta iha area rurais.
“Ita hanoin ona atu harii sentru iha distritu hotu-hotu, ita prepara grupu trabalhu jeneru mak sai formador ba sentru jeneru iha distritu ida-idak,” SE Rodrigues hateten, iha Dili.
Entretantu estudante Universidade Nasional Timor Lorosa’e (UNTL) husi Fakuldade Sosial Politika, Cesaltina Angelina, husu ba SEPI atu hatama materia jeneru nian iha universidade.
“Durante ne’e mata kuliah kona ba jeneru nian iha universidade laiha, entaun oinsa mak akademi nia papel hodi kontribui fo formasaun kona ba jeneru nian,” nia dehan.
Tanba ne’e nia sujere, ba Sekertariu Estadu Igualidade Jeneru oinsa mak formasaun jender bele integra iha UNTL.
Hatan ba kestaun ne’e, SE Rodrigues, katak UNTL iha ona eskola kona ba jeneru inklui mos sentru estudus jeneru.
“Imi la bele hein SEPI mak tenke ba, e tinan ida ne’e ami fo formasaun TOT ba imi atu nune’e imi bele hatutan servisu ne’ebe durante ne’e SEPI halo iha distritu sira,” SE Rodrigues hateten.
Iha parte seluk reprezentante husi NGO Mane ho Vizaun Foun (MVF), Marcelina Soares, kestiona kona ba kobertura media ne’ebe durante ne’e la kobre to’o iha area rural kona ba asuntu feto nian.
“Aktividade iha area rural, ami kada ves fo tiha konvite ba media sira, maibe partisipasaun media nian minimu tebe-tebes,” nia preokupa.
Nia kritika mos, katak aktividades feto nian media sempre tau ba iha pajina ikus nian (jornal) nune’e mos televizaun sempre tau ba notisia ikus deit.
Tanba ne’e nia husu ba media sira, tenke tau importansia asuntu feto nian iha sira nia media.
