Ministeriu Saude (MS) foin ezekuta 7% husi Orsamentu Jeral Estadu (OJE) 2014 nian, tuir Membru Parlamentu, katak gastus barak liu ba viajen estranjeirus nian.
Deputada Florentina Smith, hateten bazea bapublikasaun iha portal governu nian, hatudu katak ezekusaun MS nian ne’e ki’ik tebes, lolos ezekusaun to’o ona 16,7% iha fulan rua ne’e.
“Pursentu hitu ne’e, orsamentu maka’as liu iha viajen estranjeirus nian,” Deputada Smith hateten iha Parlamentu Nasional.
Deputada husi bankada opozisaun Fretilin ne’e, hateten presiza iha planu ezekusaun orsamentu ne’ebe diak, tanba iha gabinete ministeriu nian durante fulan rua nia laran ezekusaun sei zero.
Preokupasaun hanesan mai mos husi Deputada Benvinda Catarina Rodrigues, katak ezekusaun orsamentu espesifiku sira hanesan transfere pasiente ba liur, kompras aimoruk inklui ekipamentus nian laiha informasaun klaru.
“Iha pasiente barak mak ami ba haree, sira halo ezame iha ospital nasional no rezultado lori fali ba iha Klinika Chindranita mak halo analiza, entaun pasiente tenke selu $125,” Deputada husi bankada Frente Mudansa ne’e preokupa.
Entretantu Deputada Carmelita Moniz, husu ba MS tenke iha planu orsamentalne’ebe diak, nune’e bele ezekuta ho diak mos.
Tanba nia dehan, iha lei orsamental artigu 8 koalia kona ba presentajen ezekusaun, ministerio ne’ebe ezekuta la diak, sei diminui tiha iha osamentu ratifikativu.
“Kuandu to’o fulan Julhu ezekusaun la to’o 80% , sei diminui iha orsamentu ratifikativu, enkuantu ministeriu ne’ebe ezekusaun diak sei aumenta iha orsamentu ratifikativu,”Deputada Moniz hateten.
Hatan ba kestaun ne’e, Ministru Saude, Sergio da Costa Lobo, katak planu ezekusaun orsamentu balun halo no iha ona prosesu kompras, maibe seidauk selu hotu, tanba seidauk tama iha sistema.
“Se ita haree hotu total entre komitmentu, obrigasaun no cash ,ami agora atinji 19, 38%,” Ministru Lobo hateten.
Kona ba viajen ba estranjeirus, nia dehan, ne’e tuir duni planu ne’ebe tau iha orsamentu jeral do estado 2014.
Kona ba medikamentus husi orsamentu $13 miloens, nia dehan, ezekuta ona 50% hodi halo kontinuasaun akordu ho Kimia Farma atu hatama medikamentus tuir lista ne’ebe Kimia Farma atu kompras.
Alende ne’e, nia dehan, ministeriu mos loke hela prosesu tenderizasaun ba kompania sira atu hatama items aimoruk ne’ebe la tama iha lista Kimia Farma nian tanba iha items balun ne’ebe sira labele produs no presu ne’ebe karun.
