Kompania Sunrise Joint Venture (SJV) apoia fundus $120,000 resin ba organizasaun Hamutuk Ita Ajuda Malu (HIAM Health), hodi implementa aktividades to’os komunidade iha distritu Ermera.
Reprezentante kompania SJV-TL, Antonio Campos dos Santos, hateten malnutrisaun hanesan problema nasional ida ne’ebe presiza ema hotu nia apoiu hodi luta hasoru.
Tuir nia, edukasuan ne’e importante tebes, tanba malnutrisaun mosu, la’os aihan, maibe konesementu komunidades mak sei menus.
Tanba ne’e, nia dehan, SJV-TL iha komitmentu bo’ot atu ajuda komunidade Timor –Leste iha area kapasitasaun, edukasaun, saude no servisu hamutuk ho komunidade sira iha baze atu luta hasoru malnutrisaun.
Nia hatutan, SJV deside atu aloka tan fundus ba HH hodi haluan liu tan sira nia aktividades, tanba sira hatudu duni rezultado ne’ebe pozitivu tebes durante tinan 2012.
“Ami haree sira nia rezultado diak, tanba ne’e ami apoiu fali sira atu haluan sira nia programa iha distritu Ermera,” dos Santos hateten, bainhira asina akordu ho NGO HIAM Health no Fundasaun Alola Iha Timor Plaza, Dili.
Iha fatin hanesan, Diretora HIAM Health, Rosaria Martins da Cruz, hateten ho apoia ne’ebe iha sira sei haree liu ba kapasitasaun implementasuan to’os komunidade no habelar informasaun kona ba valor aihan ne’ebe fo nutrisaun ba komunidade sira.
“Ami sei reforsa Timor oan sira, hamutuk hamenus no prevene malnutrisaun iha Timor-Leste liu husi edukasaun, tanba malnutrisaun mosu la’os insufsiente hahan, maibe konesementu ba balansu aihan mak laiha,” Diretora HH ne’e hateten.
Maske sei la kobre hotu fatin sira iha distritu Ermera, maibe nia dehan, sei identifika deit grupo komunidade ida ka rua iha sub-distritu Railaco, Ermera Vila no Hatulia hodi bele hetan akompaniamentu ne’ebe diak ba implementasuan.
Entretantu Diretor Nasional Saude Komunitaria, Carlito Soares, fo agradese ba servisu parseria ho organizasaun HIAM Health, tanba ho programa sira ne’e bele ajuda ona Ministerio Saude luta kombate malnutrisaun iha Timor –Leste.
“Ajuda familia uma kain sira bele iha konesementu oinsa kuda aihoris ne’ebe ho kuantidade oituan, maibe fo benefisio ba sira nia saude,” Soares dehan.
Nia rekonese, katak malnutrisaun oras ne’e dadaun numeru sei as, maibe ho kooperasaun servisu entre Ministerio Saude ho parseiru dezenvolvimentu sira hotu konsege halo ona intervensaun lubuk ida no sei kontinua.
