Kazu oho vitima JP ne’ebe akontese iha dia 01 Marsu 2014, iha Ministeriu Negosiu Estranjeiru no Kooperasaun nian oin, agora tama ona iha prosesu investigasaun Servisu Investigasaun Kriminal nian.
Diretor Servisu Investigasaun Kriminal (SIK), Superintendente Calisto Gonzaga, hateten kazu ne’e tama ona iha sira nia lista no hahu halo ona prosesu investigasaun.
“Agora dadun prosesu la’o hela,” Diretor SIK, Superintendente Gonzaga hateten, iha Kaikoli, Dili.
Vitima JP hetan sona iha parte kabun to’o mate. Antes ne’e vitima ho nia kolega sira hemu tua iha nia (vitima) uma, no iha dader mais umenus iha tuku tolu madrugada vitima lori nia kolega fila ba kolega nia uma, depois de ida ne’e vitima la fila uma no ikus mai komunidade hetan vitima nia isin mate ne’ebe soe hela iha MNEK nia oin.
Vitima ho idade 20 ne’e aliened estudante iha eskola Tekniku Vokasional STM Becora, mos nudar negosiante kaset.
Iha parte seluk membru Komisaun B ( seguransa, defeza no negosiu estranjeirus), Deputadu Cesar Valente, konsidera kazu ne’e grave no SIK iha kompetensia atu haree ho seriu.
“Labarik ne’ebe mate ne’e sei ho idade joven ida, no nia mate ne’e tragis tebes. Polisia tenke buka tuir see maka halo aktu ne’e no prosesu nia tuir lei ne’ebe iha,” Deputadu Valente hateten.
Ejizensia hanesan mai mos husi komunidade Luis Pinto, husu ba polisia SIK buka tuir autor to’o hetan no prosesa nia tuir lei ne’ebe vigor.
“Ne’e krimi grave, tanba halakon ema nia vida, kuandu kazu ne’e husik hela, maka krimi seluk sei mosu fali,” nia hateten.
