Organizasaun Marie Stopes Timor –Leste fo atendementu programa Planeamentu Familia (PF) ba inan sira ne’ebe partus iha sala maternidade Ospital Nasional Guido Valadares (HNGV). 
Country Director MSITL, Nicola Morgan, hateten kooperasaun ne’e hahu iha Novembru tinan kotuk, ho objetivua atu fornese atendemnetu ba inan foun sira no fahe informasaun kona ba opsaun fo espasu ba oan atu inan sira bele hili hodi fo espasu ba sira nia isin rua tuir mai.
Tempu ne’ebe diak atu fo informasaun kona ba opsaun sira fo espasu ba oan mak, nia dehan, bainhira inan sira partus ona atu sira bele hanoin fo espasu ba isin rua tuir mai.
“Ita hakarak atu ajuda inan foun sira hodi bele rekopera sira nia saude no bele tau matan diak liu tan ba sira nia oan ne’ebe foin moris,” Morgan hateten, iha Bidau, Dili.
Nia hatutan, kada loron Segunda-feira ekipa (choice Dili) hamutuk ho pesoal saude iha HNGV sei fo atendementu planeamentu familiar ba inan sira ne’ebe partus ona iha sala maternidade HNGV nian.
Bazeia ba estatistika ne’ebe MSITL iha hahu iha fulan Novembru tinan kotuk to’o Febreiru 2014 ekipa MSITL ho HNGV konsege fo ona atendementu planeamentu familiar ba inan feto sira hamutuk rihun 200 resin.
Iha fatin hanesan, Diretor Jeral HNGV, Domingos Soares, hato’o agradese wa’in ba prezensa ekipa MSITL nian iha HNGV ne’ebe ajuda pesoal saude sira iha sala maternidade no enfermajen nian hodi fo atendementu planeamentu familia ba sira.
Nia hatutan, HNGV sei esforsu maka’as atu servisu hamutuk ho parseirus sira hotu ne’ebe iha hodi fo atendementu ba komunidade sira.
“Ami oferese fatin duni no pesoal sira iha ne’e atu servisu hamutuk MSITL atu fo atendimentu ba inan sira,”dehan Soares.
Entretantu, Isabel Eduarda, sente kontente tanba iha benefisiu barak mak nia hetan hafoin tuir planeamentu familiar.
“Hau bele hadia an, saude diak, bele fo atensaun ba oan ki’ik no bele ajuda la’en buka osan hodi hadia ekonomia familia nian,” nia hateten.
Enkuantu efeksaun seluk bainhira tuir planeamentu familiar, mak hanesan halo nervozu lalais no ulun moras.
