Sekretaria Estado ba Promosaun Igualidade (SEPI), Idelta Maria Rodrigues hateten katak tinan ida sira sei halo kampania sosializasaun no dialogu aberta ho profesores no estudantes iha 13 distritus kona ba lei kontra violensia domestika no tratadus internasional sira ne’ebe estado ratifika. 
Nia haktuir sira halo mudansa ba mekanismu sosializasaun ne’e bazeia ba situasaun real ne’ebe akontese durante ne’e violensia barak liu akontese mos iha eskola sira ne’ebe komete husi profesores sira no alunus barak mak mate tara an tanba hasoru problema oioin.
“Tinan ida ne’e ami atu halo dialogu aberta, sosializasaun ho sira atu hasae’ sira nia konsiensia hodi bele hapara violasaun seksual ne’ebe akontese iha eskola,” SE Rodrigues hateten.
Aleinde ne’e, nia dehan, sira mos sei kontinua halo sosializasaun no dialogu ho komunidade, lideransa local involve mos polisia komunitaria sira kona ba lei kontra violensia domestika no rezolusaun 1325 kona ba feto iha seguransa no paz.
Nia hatutan sosializasaun nafatin lao maibe atu redus numeru kazu Violensia Domestika ne’e responsabilidade ema hotu nian atu kombate.
Entertantu Deputada Ilda Maria da Conçeicão, konkorda tanba maske iha eskola deklara ona zero toleransia, maibe violensia nafatin akontese, pior liu tan violasaun no abuzu seksual ne’ebe komete husi profesores sira.
Membru Komisaun F (saude, edukasaun,kultura, veteranus no igualidade jeneru) ne’e, hateten dialogu aberta ne’e tenke involve instutisaun relevantes, hanesan sosiedade sivil, Unidade Polisia ba Ema Vulneravel no setor judicial, liu-liu profesores sira.
“Sei iha violensia barak ne’ebe akontese iha eskola hau hanoin ida ne’e programa ida diak oinsa ita atu hamenus violensia iha ita nia rai tanba durante ne’e ita dehan zero toleransia maibe ita hare akontese nafatin,”nia hateten.
