Amante sosidade hadomi tebe bola diskunfia Federasaun Futeboll Timor-Leste(FFTL) iha indikasaun korupsaun, tanba maske sira halo kontratu ho Kompania Digicel no Timor-Telekom, maibe laiha relatoriu.
Porta voz Amante Futebol Timor-Leste, Jose Luis de Oliveira, hateten kontratu ne’ebe FFTL halo ho kompania rua ne’e ho intensaun atu hadia moru kampu futebol demokrasia (lapangan pramuka), maibe total orsamentu sira la fo sai.
“Sira nunka informa ba iha publiku, nunka fo sai relatoriu ba iha publiku kona ba osan tama no osan sai,” Porta Voz Oliveira hateten, hafoin hasoru malu ho Komisaun F, iha Parlamentu Nasional.
Nia hateten, tuir informasaun ne’ebe nia hetan no rona katak total orsamentu kontratu husi kompania rua ne’e hamutuk $500 mil resin.
“Torneiu ruma mos ita nunka haree, entaun osan sira ne’e ba iha ne’ebe,” nia dehan.
La’os ne’e deit, nia hateten uluk FFTL mos fo aluga tiha kampu demokrasia ne’e ba artista sira uja halo konsertu, maibe osan sira ne’e ba ne’ebe mos “ita la hatene,” nia kestiona.
Entretantu Koordenador Amante Futebol Timor-Leste, Jose Carvalho, ejiji FFTL atu halo debate publiku ho Amante.
“Ami lakohi koalia taka matan, debate aberta para buat ne’e los iha ne’ebe no sala iha ne’ebe,” nia hateten.
Iha sorin seluk Prezidente Komisaun F (edukasaun, saude, kultura, veteranus no igualidade jeneru), Deputadu Virgilio Hornai, hateten hahalok FFTL kona ba osan $500 mil resin ne’ebe laiha relatoriu no falsifika dokumentus redus tinan jogador sira nian, ne’e krime.
“Ne’e krime, kualker aktus sidadaun ida ga organizasaun ida, halo ita hotu la tolera ba buat sira ne’e,” Deputadu Horanai hato’o.
Preokupasaun seluk ne’ebe Amante hato’o ba Komisaun F mak, nia dehan, jogador naturalizasaun mosu bar-barak inklui orsamentu ne’ebe mai husi Sekretariu Estadu Joventude (SEJD) laiha relatorio.
Tanba ne’e Komisaun F sujere ba SEJD) fasilita dialogu entre FFTL ho Amante, atu nune’e bele rezolve problema ne’e.
Hatan ba preokupasaun ne’e Sekretariu Estadu Miguel Manetelo, hateten SEJD sei la intervene ba problema kona ba FFTL nian ne’ebe dadaun ne’e publiku kestiona.
“Governu interven halo saida, governu so bele halo interven bainhira FIFA suspende,” SE Manetelo hato’o.
Nia mos husu ba dirijente FFTL atu simu kritika husi parte seluk, tanba kritika hirak ne’e hanesan motivasaun ida para oinsa bele hadia diak liutan.
