Organizasaun Fundasaun Alola ejiji ba Sekretariu Estado Politika Formasaun Profesional e Empregu (SEPFOPE) atu kria divizaun ketak ida ba trabalhador feto sira, hodi hato’o sira nia keixa bainhira hetan violasaun iha servisu fatin. 
Diretora Fundasaun Alola, Alzira Reis, hateten trabalhador feto barak mak durante ne’e hetan violasaun husi empregadores inklui violasaun seksual, maibe laiha korajen atu hato’o keixa, tanba seidauk iha divizaun espesifiku kona ba asuntu sensitive hanesan ne’e.
“Ami hakarak divizaun ida ketak atu feto sira bele hato’o sira nia keixa iha ne’eba no SEPFOPE tenke habelar liu tan informasaun kona ba lei do trabalho,” Diretora Reis sujere, iha Mascarenhas,Dili.
Razaun kria divizaun ida ketak, nia dehan, atu kria situasaun ida ne’ebe comfortable ba trabalhadora sira, bainhira iha keixa ruma ne’ebe sensitive.
Hatan ba kestaun ne’e, Diretor Jeral SEPFOPE, Jacinto Barros Gusmão, katak SEPFOPE sei la estabelese divizaun ketak ida kona ba asuntu ne’e, tanba tuir lei laboral ida ne’e diskriminasaun.
Nia dehan, iha lei ne’e asegura ona igualidade jeneru, tanba ne’e la presiza estabelese divizaun ba mane no feto, importante mak rona ema hotu nia preokupasaun hodi buka solusaun ba problemas.
“Iha lei ne’e dehan, labele iha diskriminasaun ba feto no mane, maibe ita prontu atu apoia sira,” nia dehan.
