Organizasaun Lalenok Ba Ema Hotu (LABEH) husu ba Komisaun Anti Korupsaun (KAK) atu halo investigasaun ba Ministeriu Saúde ne’ebe fahe osan $ 4,440,00 ba komunidade sira iha sub-distritu Atauro, iha Janeiru 2014 ne’e.
Diretor Ezekutivu LABEH, Júlio Gil da Silva Guterres, hateten osan ida ne’e ho intensaun atu selu kompensasaun ba komunidade uma kain hamutuk 75 resin ne’ebe sai vitima ba programa Ministeriu Saude nian atu harii kampu aviasaun iha sub-distritu Atauro hodi bele halo evakuasaun ba pasiente emergensia.
“KAK tenke loke prosesu investigasaun ida ba ministeriu saude liu –liu focal point ne’ebe hamutuk autoridade local sub-distritu Atauro fahe $120,00 kada uma kain, ita hanesan fali fahe aitahan iha dalan,” Diretor LABEH, Gil da Silva hateten, iha konferensia da imprensa ne’ebe hala’o iha Salaun LABEH Comoro, Dili.
Diretor ne’e mos konsidera kompensasaun sira ne’e la justu, tanba kada uma kain ida simu osan ho montante $ 120,00, maibe sira lakon sira nia hela fatin no aihoris ne’ebe durante ne’e fo moris ba sira.
Nia hatutan, bainhira laiha resposta ruma husi governante sira ba kestaun ida ne’e, LABEH hamutuk ho familia vitima sira sei hato’o keixa ba iha Prezidente da Republika.
Entretantu reprezentante familia vitima, Lew Comacose, rekonese katak rai ne’ebe sira okupa ba ne’e estadu nia rain, maibe sira hela iha rai ne’e desde tinan 1982 to’o mai ohin loron, tanba ne’e sira sei la fo rai ne’e atu halo kampu aviasaun.
“Ami la konkora 100%, ami sei la fo fatin, ami husu deit atu fo kompensasaun ba ami nia aihoris ne’ebe estragus ona, mais rai ami sei la fo,” Lew hateten.
Nia dehan, iha familia uma kain hamutuk 37 mak ho situasaun obrigatorio sira simu ona osan kompensasaun $120,00 no fos MTCI 25 kg kada uma kain, maibe iha balun mos seidauk simu.
Nia hatutan, osan $120,00 ne’e sira labele moris ho tempu ne’ebe naruk sira presiza rai atu kuda buat ruma hodi sustenta sira nia moris nudar ema agrikultor.
Iha parte seluk, Ministru Saude, Sergio da Costa Lobo, hateten politika ministeriu nian atu harii kampu aviasaun iha Atauro atu bele salva ema barak nia vida tanba uja roo dalaruma la seguru no presiza oras ida nia laran to’o mai iha Dili.
Nia haktuir, katak governu aloka ona orsamentu ho montante $6,000 resin no fos toneladas rua atu fahe ba iha populasaun sira ne’ebe hela iha rai ne’e, ne’e hanesan kompensasaun iha uma kain 38 mak simu ona apoiu sira ne’e no iha balun ne’ebe seidauk simu.
“Ami sei buka dalan atu resolve pasivikamente entre populasaun ho administrasaun local iha ne’eba,” Ministru Lobo hateten.
