Instituisaun Polisia Nasional Timor-Leste kria planu estratejia ba tinan 2014 to’o 2018 nian no planu hirak ne’e hanesan mata dalan hodi orienta polisia durante tinan hirak ne’e nia laran.
Komandante Jeral Polisia Nasional Timor-Leste (PNTL), Komisariu Longuinhos Monteiro, hateten planu estratejiku ne’e estabelese ho objetivu sentral rua ; hanesan mandata liu husi governu atu reforma, dezenvolve no konsolida orden public no seguransa komunidade nian.
“Ne’e sai hanesan dokumentus ida ne’ebe importante liu hotu ne’ebe ami dezenvolve, nia la’os deit hatuur no hakerek ami nia vizaun, misaun no prioridade sira, maibe sai fundasaun ba dalan oinsa atu dezenvolve seguransa publiku iha Timor Leste,” Komisariu Monteiro hateten, iha Kaikoli, Dili.
Planu ida ne’e mos, nia haktuir, sei tulun PNTL atu kumpri tuir obrigasaun atu defende direitu sidadaun sira nian no defende prinsipiu sira ne’ebe garante moris hakmatek no paz, harmonia ba povu hotu-hotu iha Timor – Leste.
Iha fatin hanesan Xefe Departementu Administrasaun Planeamentu, Superintendente Joao Belo dos Reis, hateten planu estratejia ne’e produs bazea ba ideas husi komandante no husi membrus polisia rasik.
”Ideas sira ne’ebe komandante iha, sai hanesan dokumentus planu estrategia PNTL nian, no halo workshop dala ida iha colegio, no retiru iha Rairobo ho membru Polisia sira,” Superintendente Reis hateten.
Planu estratejia hirak ne’e, nia dehan, sei halo sosializasaun uluk ba komandante distritu iha distritu 13.
“Nia implementasaun hahu husi Dili uluk, depois maka distritu seluk,” nia hateten.
Enkuantu Diretor Ezekutivu Fundasaun Mahein, Nelson Belo, hateten ho planu estratejia ne’e, PNTL nia atendementu ba publiku responsive, responsible no imediatu ba nesesidade fornese seguransa iha rai laran.
