Ministru Administrasaun Estatal (MAE), Jorge da Conceicao Teme, hateten MAE koordena ona ho Timor-Telekom (TT) atu dada internet ba administrasaun distritu no sub-distritu sira hodi fasilita servisu ho diak liu tan.
Ministru Teme, hateten durante ne’e iha administrasaun distritu no sub-distritu iha ona internet, maibe la funsiona e presiza hadia’a fila fali.
“Ita nia administrador distritu no sub-distritu balun ladun hatene loke komputador no mos la hatene operasaun ba internet,” Ministru Teme hateten, iha Parlamentu Nasional.
Kona ba internet ne’ebe at fali , nia dehan, tanba administrador sira hirus baku arbiru deit mak internet at tiha.
“Ami kontratu tiha ona kompania ida ne’ebe bele kontrola sasan sira ne’ebe at iha distritu no sub distritu,” Ministru Teme hato’o.
Iha sorin seluk Deputadu Cesar Valente de Jesus, hateten administrador sub-distritus balun organizadu, maibe barak mak dezorganizadu.
“Ita hare viatura sira ne’e deit administrador sira uja la tuir nia dalan,” Deputadu de Jesus hateten.
Iha nia observasaun durante ne’e, nota katak seguransa iha distritu ladun efetivu, administrador sira uja viatura tuir sira nia hakarak deit.
Tanba ne’e nia dehan, dada internet ba iha admistrador sub-distritus hein lai, wainhira implementa munisipiu mak dada internet.
Iha fatin hanesan Deputadu Agostino Lay mos preokupa tebes, tanba administrasaun distritu no sub-distritu durante ne’e internet la funsiona ona atu asesu ba informasaun.
“Agora internet la instala ona atu sira asesu ba informasaun ,”Lay kestiona.
Tan ne’e nia sujere ba MAE atu normaliza fila fali internet ba administrasaun distritu no sub-distritu sira atu nune’e bele fasilita sira nia servisu.
