Sekretariu Estado Politika Formasaun Profesional e Empregu, Ilidio Ximenes da Costa, hateten atu redus numeru dezempregu iha rai laran, setor privadu tenke hola papel masimu hodi loke kampu servisu ba joven sira. 
Nia hateten, iha tinan 2013 SEPFOPE fo formasaun kapasitasaun ba foinsa’e hamutuk 3,769 kompostu husi mane nain 2,084 no feto 1,695, iha area espesialidade hanesan karpintaria, elektronika, komputador, administrasaun no seluk tan.
Nia hatutan, husi numeru ne’ebe iha, nain 433 mak hetan servisu ona no nain 3,340 seidauk hetan servisu, tanba laiha kampu servisu liu –liu iha setor privadu sira.
“Ida ne’e mak presiza ita hotu nia kontribuisaun liu –liu setor privadu Timor oan sira, katak ita produs ita nia ema, ita mos presiza utilize no rekonese sira nia formasaun hodi compete iha merkaduria,” SE Ximenes hateten, iha Parlamentu Nasional.
Nia dehan, governu iha ona programa hanesan haruka joven sira ba servisu iha Korea do Sul no Australia, maibe setor privadu sira iha rai laran mos tenke kontribui hodi simu foinsa’e sira ne’e atu hasa’e sira nia konesementu diak liu tan ba area espesifiku sira ne’ebe iha.
Entretantu Deputadu Antoninho Bianco, rekomenda ba SEPFOPE atu organiza baze de dadus ida kona ba foinsa’e sira ne’ebe hetan ona formasaun profesional no ema estranjeirus ne’ebe mai Timor –Leste, tanba realidade ema estranjeirus sei domina.
Nia mos preokupa ho servisu SEPFOPE nian liu –liu ba politika formasaun professional, tanba barak liu tun ba baze halo projetu, presiza fo atensaun ba formasaun hodi prepara foinsa’e sira atu kompete iha merkadu trabalho.
“Iha pratika ita produs duni ita nia profesionais sira iha rai laran, para atu halo kompetisaun iha rai laran no iha Asia,” nia dehan.
Preokupasaun hanesan mai mos husi Deputada Virginia Ana Belo husu atu SEPFOPE prepara foinsa’e sira ne’ebe iha rai laran hodi kompete ho trabalhador sira husi estranjeirus, tanba realidade kampu servisu sira ne’ebe iha maioria okupa husi trabalhador estranjeirus.
