Membru Parlamentu Nasional sujere ba Ministeriu Admistrasaun Estatal tenke kria lei ida ne’ebe rigorozu hodi regula ema atu labele soe foer arbiru iha sidade laran.
“Atu nune’e bele fo sansaun ba ema ne’ebe soe foer arbiru,” Deputadu Adriano Joao sujere, iha Parlamentu Nasional.
Deputadu husi bankada Partidu Demokratika (PD) ne’e hateten, sidade Dili odamatan nasaun nian ne’ebe tinan-tinan sempre hala’o eventu nasional, tenke moos.
Nia dehan, sidade Dili kontinua nakonu ho foer, tanba komuidade sira laiha konsiensia atu oinsa mak bele moris iha ambiente ne’ebe saudavel.
Entretantu Deputada Ana Belo, hateten tempu to’o ona atu kria diploma ministerial ida para fo sansaun ba ema ne’ebe soe foer arbiru.
“Xefe suku sira bele organiza populasaun sira iha suku laran para bele halo limpeza,” Deputada Belo hateten.
Tanba ne’e nia husu ba xefe suku no xefe aldeia sira, fo avizu ba sira nia komunidades atu labele soe foer arbiru.
“La’os hein fali Primeiru Ministru no ministru sira tun ba hamoos to’o iha ita nia uma oin,” nia dehanj.
Aleinde ne’e Ministru Administrasaun Estatal (MAE), Jorge da Conceicao Teme, rekonese katak governu seidauk estabelese regulamentu ida atu determina ema soe fo’er tuir oras .
“Ita soe lixu 24 oras, maibe ita lalin ne’e loron ida deit, tanba ne’e mak ami halo hela elaborasaun lei ida kona ba orariu atu soe lixu no mos oinsa ita aplika sansaun ne’ebe bele hatauk ema atu soe lixu arbiru,” Ministru Teme informa.
Teme hatutan, dala ruma komunidade sira soe lixu iha duni nia fatin maibe, dala ruma animal sira mos kontribui dada sai lixu husi nia fatin.
