Membru Parlamentu Nasional konsidera problema bo’ot ne’ebe estudantes Timor oan hasoru dadaun mak kona ba lian, tanba eskola balun liu-liu iha Ensino Superior Privadu to’o agora uja deit lian Indonezia hodi hanorin iha eskola.
Deputadu Paulino Monteiro, hateten lian sai obstaklu bo’ot ba sira iha prosesu aprendizajen, tanba estudante sira iha eskola Ensino Baziku (novi anos eskolaridade) to’o Ensino Sekundariu aprende ho lian POrtugues, maibe iha Ensino Superior Provadu uja fali Indonezia.
“Ita tau tiha lingua ofisial iha konstituisaun, maibe iha pratika uja lian Indonezia hanorin ba estudantes, ne’ebe lingua ne’e sai obstaklu, liu-liu bainhira halo tesis ruma,” Deputadu Monteiro hateten, iha Parlamentu Nasional.
Tanba ne’e deputadu husi bankada Partidu Demokratika (PD) sujere ba Ministeriu Edukasaun tenke tau atensaun ba problema ne’e.
Iha fatin hanesan Deputadu Antonio Serpa Dadonus, hateten estudante sira iha eskola Ensino Baziku no Sekundariu aprende lingua Portugues kapaas tiha, maibe tama iha universidade aprende fali ho lian Indonezia, bele afeta ba sira nia notas.
“Sir abele haluhan tiha Portugues,liu-liu sir abele hetan valor la diak, tanba la komprende lian Indonezia,” nia hateten.
Hatan ba preokupasaun ne’e Ministeru Edukasaun, Bendito Freitas, katak ME iha ona planu atu fasilita formasaun lingua Portugues ba dosente Institu Ensino Superior Privadu sira.
“Ministeriu iha alokasaun orsamentu atu faslita formasaun lingua Portuguesa ba professor no dosente sira iha institute ensino privadu sira,” nia hateten.
Ministru Freitas, hateten agora presiza hare monitoramentu ka supervizasaun ba eskola sira ne’e, tanba ministeriu halo ona transferensia ba universidade sira.
