Administrador Ospital Nasional Guido Valadares (HNGV), Francisco Pereira do Rego, hateten problema stok aimoruk iha ospital nasional rezolvidu ona, tanba hetan supporta medikamentus no konsumoveis balun husi kompania Istana Farmasia. 
Nia rekonese, katak iha tinan kotuk liu ba iha duni stok out items balun iha ospital nasional, maibe konsege resolve tanba ospital iha kontratu ho kompania istana farmasia atu hatama aimoruk bainhira sentru medikamentus stok laiha.
“Hau foin simu relatorio stok aimoruk, agora dadaun ita ladun infrenta problema menus aimoruk, mesmu ita iha sentral farmasia menus ita sempre hetan supporta husi Istana Farmasia,” Administrador HNGV ne’e hateten,iha Bidau, Dili.
Nia haktuir, katak akordu ne’ebe ospital hala’o ho kompania istana farmasia ne’e desde governu anterior nia kontinuasaun to’o tinan 2015 remata.
Iha parte seluk, Xefe Departamentu Farmasia HNGV, Inacio da Costa, hateten sira foti aimoruk no konsumoveis iha istana farmasia dala barak ona, maibe ho kuantidade ne’ebe ki’ik.
“Governu halo kontratu ho istana farmasia hodi supporta aimoruk balun, maibe la’os tuir nesesidade bo’ot, ne’e la’e,” nia hateten.
Dala ruma, nia dehan, ba iha istana farmasia mos aimoruk espesifiku balun laiha duni, maibe ospital esforsu atu halo impresta iha apotek balun hodi fo atendimentu ba pasiente sira hein husi sentral medikamentus.
