Tuir peskiza organizasaun Fundasaun Alola (FA) nian, hatudu katak maioria trabalhador feto iha nasional no distrital laiha konesementu ba lei do trabalho ne’ebe vigora iha tinan 2012.
Diretora Fundasaun Alola, Alzira Reis, hateten peskiza ida ne’e baziku tebes ne’ebe ho objetivu atu hare implementasaun lei do trabalho no kondisaun trabalahdor feto sira iha seitor privadu e realidade maioria laiha konesementu ba legislasaun ne’ebe proteje sira nia direitu.
“Ami sei servisu hamutuk ho SEPFOPE habelar liu tan informasaun liu –liu sosializasaun lei do trabalho ba publiku,” Diretora Reis hateten, bainhira halo lansamentu ba rezultadu peskiza, iha salaun Fundasaun Alola, Mascarenhas, Dili.
Nia hateten, distritu ne’ebe sai alvu ba peskiza ne’e mak distritu Dili, Baucau no Bobonaro hodi halo komparasaun ba implementasuan lei do trabalho iha nasional no distrital sira inklui mos konesementu trabalhador sira nian ba lei do trabalho rasik.
Entretantu Sekretaria Estado Promosaun Igualidade (SEPI), Idelta Maria Rodrigues, apresia ho relatorio ne’e no husu ba Sekretario Estado Politika Formasaun Profesional e Empregu (SEPFOPE) atu kria mekanismu sosializasaun ida ne’ebe diak, transforma informasaun sira ne’e ba trabalhador sira liu –liu artigu espesifiku sira ne’ebe iha.
Nia dehan, lei ne’e la’os trabalhador sira deit mak la hatene, maibe empregador sira mos laiha konesementu ba lei ne’e, tanba ne’e sosializasaun importante tebes.
“Hau hanoin presiza iha mekanismu sosializasaun ba lei do trabalho hau mos husu ba organizasaun sira ne’ebe hasai rezultado ida ne’e atu fo nafatin formasaun ba trabalhador sira atu sira bele hatene sira nia direitu,” SE Rodrigues dehan.
Sekretario Estado, Elidio da Costa Ximenes, rekonese katak sosializasaun ba lei do trabalho sei menus, tanba ne’e trabalhador barak mak laiha konesementu ba lei ne’e.
“Tanba lei ne’e aprova iha 2012, iha tinan 2013 hau esforsu an no brani foti desizaun ami halo sosializasaun to’o iha distritu hotu no sub-distritus, balun seidauk la’o hotu, ne’e hau rekonese,” SE Ximenes rekonese.
Alende ne’e sira mos uja meius komunikasaun via SMS atu pasa informasaun ba ema hotu
Promete katak iha tinan ida ne’e sira sei esforsu atu haforsa programa sosializasaun informasaun ba trabalhador sira liu –liu artigu espesifiku sira ne’ebe liga ho trabalhador feto sira atu sira bele hatene sira nia direitu espesifiku ne’ebe hakerek iha lei ne’e hanesan materniadade, protesaun espesial ba feto no seluk tan.
