Ministeriu Administrasaun Estatal kopera ho Sekretariu Estadu Obras Publiku (MAE-SEOP) sei kria diploma konjunta ministerial ne’ebe integradu kona ba hari uma iha sidade Dili no iha distritus.
Sekretariu Estadu Obras Publiku, Luis Vaz Rodrigues, hateten iha planu ida ne’e sei involve ministeriu barak.
“Ita laiha diploma ida, ita servisu laiha baze legal,”SE Rodrigues hateten, iha Parlamentu Nasional.
Nia hateten, SEOP kaer deit kona ba jestaun operasional nian kona ba planu ida ne’e, enkuantu jestaun funsional institusional iha ministeriu sira nia liman.
Entretantu membru Komisaun E (infra-estrutura, transporte no komunikasaun), Deputadu Paulino Monteiro, hateten planu urbanu (tata kota) ne’e diak no kestaun ne’e foti bebeik ona, orienta hodi harisidade tuir padraun.
“Ema nian iha Cabo-Verde sira halo sira nia planu urbanu ne’e la’o ho orden,” Deputadu Monteiro hateten.
Nia dehan, planu urbanu ne’e orienta ema halo uma iha sidade tuir nia dalan.
“Ita halo master plan ne’e hotu tiha mak foin servisu hamutuk ho obras publika, sira hatun orientasaun hodi halo uma estrada lao hanesan ne’e no uma monta hanesan ne’e, baleta la’o hanesan ne’e,” nia hateten.
Tuir esperiensia ne’ebe deputadu ne’e hetan iha Cabo-Verde, katak halo uma arbiru deit estadu haruka trator no bolduzer sobu hotu.
Tanba ne’e, nia sujere, ba futuru governu tenke halo renovasaun ba sidade atu nune’e bele la’o tuir lei no orden.
Iha sorin seluk Vise Prezidente Komisaun E, Deputadu Inacio Moreira, katak hakarak ga lakohi planu ne’e tenke implementa.
Nia hateten, kuandu governu implementa ona planu urbanizasaun presiza mos implementa tata kota.
“Kondisaun agora dadauk ita infrenta iha sidade Dili, ita sei gasta tan kustu bo’ot liu,” Deputadu Moreira hateten.
Estadu no governu sei gasta tan osan barak ba planu ne’e, tanba sei hasai komunidade sira ne’ebe halo uma iha sidade Dili.
“Sidade nasaun nian hakarak ga lakohi tenke halo, mais hau iha hanoin seluk fali katak,sidade Dili ne’e bele husik hela hanesan sidade tuan ba nasaun ninian,”Moreira sujere.
Tanba ne’e nia sujere ba futuru halo dejenbolvimentu ne’ebe mak diak ho ninia tata kota tenki muda sai atu nune’e bele ekstende sidade bele luan liu tan.
Deputadu ne’e mos la menta tanba Governu Aliansa Maioria Parlamentar(AMP) nia tempu iha duni Departamentu ida ne’ebe taumatan ba urbanijasaun maibe departamentu ne’e la halo nia servisu.
Iha governu AMP, Sekretraiu Estadu Eletrisidade mak asumi hotu kna’ar ne’e maibe hahu iha 2007 to’o mai 2012 konsentra liu mak eletrisidade.
