Atu hasa’e konesementu komunidade kona ba balansu aihan ne’ebe fo nutrisaun ba saude, organizasaun Hiam Health iha ona planu atu dezenvolve programa mobile kitchen iha komunidade sira nia le’et. 
Diretora Hiam Health (HH), Rosalia da Cruz, hateten edukasaun promosaun no kontribuisaun, familia nudar save principal atu redus numeru malnutrisaun iha rai laran, tanba povu Timor –Leste falta konesementu ba diversifikasaun aihan.
“Programa ida ne’e ami hanoin hela iha ami nia ulun atu hare iha tinan ne’e (2014), maibe hau presiza suporta,” Diretora HH, Rosalia da Cruz hateten, iha Aimutin, Dili.
Nia hatutan, organizasaun iha hanoin atu dezenvolve hodi kontribui ba redusaun malnutrisaun iha rai laran, maibe organizasaun laiha forsa atu implementa tanba aktividade ne’ebe durante ne’e organizasaun hala’o laiha income.
“Ami iha hanoin atu halo buat ruma ba dezenvolvementu Timor-Leste, maibe ami nia difikuldade mak financial,” nia hateten.
Nia dehan, programa ida ne’e positive tebes tanba la’os koalia deit maibe tun ba iha baze direitamente atu sosializa informasaun prevensaun malnutrisaun no pratika demostrasaun aihan ou pratika tein aihan ne’ebe fo nutrisaun diak ba ema nia saude.
Entretantu Deputada Josefa Alvares Pereira Soares, konsidera povu Timor –Leste sei falta konesementu kona ba komposisaun aihan, tanba maioria ho hanoin ida han fos lor-loron mak diak liu duke modo tahan no aifuan sira.
Nia dehan, governu iha obrigasaun atu kria politika adekuadu ida no buka servisu hamutuk ho sosiedade sivil sira, dezenvolve programa edukasaun promosaun ba nutrisaun tanba povu Timor –Leste presiza pratika demostrasaun aihan.
“Hau hanoin Timor –Leste hamlahan ne’e laiha, maibe oinsa atu hadia aihan fo nutrisaun diak ba sira nia saude, hau hanoin ida ne’e kuran tebes iha ita rai Timor, ita ladun hatene kompozisaun aihan,” Deputada husi bankada Fretilin ne’e dehan.
Iha parte seluk, Juandina da Silva, nudar dona da casa, hateten ne’e planu ne
Ebe diak no interesante, tanba durante ne’e diresaun edukasaun saude sira koalia aihan produtu local sira ne’ebe iha hotu nutrisaun ba saude labarik nian, maibe laiha pratika susar atu inan sira atu tein tuir.
“Hau hanoin planu ne’e kapas tebes governu tenke supporta hanoin sira ne’e atu implementa, tanba inan sira presiza pratika oinsa tein aihan ne’ebe diak no ijiene ba ema nia saude, la’os koalia deit,” nia dehan.
