Organizasaun internasional pronto atu servisu hamutuk ho organizasaun Uniaun Joventude Haburas Ambiente, sosializa atividade no promove dame no hadomi ambiente ba iha komunidade sira. 
Tanba, tuir Koordenador Programa Caritas Australia, Fernando Pires, katak bainhira komunidades hadomi ambientes, bele kria dame iha bairo laran.
Nia dehan, Caritas Australia apoia fundus $2,000 resin ba organizasaun Uniaun Joventude Haburas Ambiente (UJHA), hodi hakerek sira nia lei inan, registu iha NGO Forum nudar NGO legal inklui prepara planu estratejiku.
“Iha programa rua mak interesante tebes baa mi; hare oinsa ami bele servisu hamutuk ho organizasaun ne’e iha future, hanesan komunikasaun sein violensia no promove dame liu husi hadomi meiu ambiente,” Koordenador Pires hateten, hafoin partisipa serimonia lansamentu organizasaun UJHA, iha LABEH Comoro, Dili.
Kona ba apoia, nia dehan, depende ba proposta ne’ebe organizasaun sira hatama ba Caritas Australia, oras ne’e dadaun iha ona organizasaun 20 mak hetan apoia no kada tinan ida Caritas Australia fo ba parseirus sira ho montante $8,000 to’o $10 mil.
Entretantu Diretor Ezekutivu UJHA, Rui Manuel da Silva, hateten atividade ne’ebe sira sei halo iha tinan tolu nia laran mak halo sosializasaun, seminar hodi hasa’e konsiensia komunidade sira atu hadomi ambiente.
Alem de ne’e , nia dehan, ekipa UJHA mos sei halo produsaun sasan sira hanesan pasta, binkai no seluk tan husi lixu fa’an no hetan rendimentu.
“Ne’e hanesan motivasaun ida ba komunidade sira katak lixu mos bele fo benefisiu ba ita,” nia dehan.
Kona ba planu estratejiku ba tinan tolu oin mai, nia dehan, distritu rua mak sei alvu ba atividade organizasaun nian hanesan distritu Dili no Ermera no sei dezenvolve ba distritu seluk iha futuru.
