Durante tinan 2013, Parlamentu Nasional konsege aprova deit lei rua, mak hanesan Lei Brankeamentu Kapitais no Lei Organika Prezidente Republika nian.
Deputadu Antoninho Bianco, hateten Parlamentu Nasional (PN) aprova deit lei rua ne’e, tanba iha 2013 nia laran governu la hatama proposta lei ba iha parlamentu.
“Brankeamentu kapitais ne’e ami komisaun rasik nia inisiativa e husi governu mak lei organika prezidenti da republika nian,” Deputadu Bianco dehan, iha PN.
Deputadu husi bankada Fretilin ne’e, dehan PN hakarak atu aprova lei lolos maibe governu la hatama proposta mai iha parlamentu.
“Iha 2013 nia laran ne’e governu foin mak prepara konsulta,” Deputadu Bianco esplika.
Nia dehan, lei hirak ne’ebe mak to’o agora seidauk aprova mak hanesan Lei Desentralizasaun ninian, lei ne’e halo konsulta iha distritus 13.
Lei balun ne’ebe mak foin tama mai iha Fulan Dezembru 2013 nia laran ne’e mak Lei Pakote Rejime, Lei Rai nian inklui Lei Komunikasaun Sosial, restu seidauk hatama mai.
“Lei rua ne’e seidauk halo diskusaun, tanba iha fulan Dezembru nia laran ami estudu mos kona ba Orsamentu Jeral Estadu 2014 nian,” nia dehan.
Iha fatin hanesan Deputada Brigida Correia, rekonese katak iha mandatu III lejislatura ne’e lei balun deit mak PN konsege aprova.
“Ami halo revizaun kona ba konta jeral do estadu no mos lei selu-seluk tan, hanesan akordu internasional nian,” nia hateten.
Tuir nia, lei rua mak importante liu, mak Lei Anti Korupsaun no Lei Rai nian, tanba ne’e bainhira diskusaun OJE 2014 remata, PN sei tau konsiderasaun ba leis ne’e.
Enkuantu Deputadu Arao Noe, membru Komisaun A ne’e rekonese katak, iha mandatu terseira lejislatura ida ne’e aprova lei minimu tebe-tebes.
“Ami aprova iha ne’e mak alterasaun ba brankeamentu kapital no finansiamentu terorismu,maibe lei sira seluk laiha,” Deputadu Noe hateten.
Kona ba lei barak mak seidauk aprova, nia dehan, ne’e tanba governu mak la hatama proposta mai iha Parlamentu.
“Parlamentu simu, analiza, diskuti, aprova depois prezidenti promulga tuir sistema ne’ebe mak la’o,”Noe esplika.
Entretantu Vise Prezidenti Parlamentu, Deputadu Adriano do Nascimento, labele fo komentariu kona ba asuntu ne’e, tanba ne’e knar deputadu ida-idak nian atu hamosu projetu lei.
“Hau bele produs, maibe hau labele jeneraliza, ne’e kna’ar deputadu ida-idak nian atu produs lei,” nia katak.
