Sekretario Estado Politika Formasaun Profesional e Empregu (SEPFOPE), Ilidio da Costa, hateten oras ne’e dadaun SEPFOPE hamutuk ho Internasional Labour Organization (ILO) hahu dezenu ona sistema atu halo survey ba trabalhador infantil. 
Nia dehan, iha duni dadus balun ,maibe dadus sira ne’e la dun organizadu tanba ne’e presiza kria sistema ida ne’ebe diak hodi bele hatama dadus sira ne’e iha database ida.
“Atu detailhu liu tun ba lapangan, hau koalia ona ho ILO atu sira bele hahu dezenu sistema hodi la’o tuir,” SE Ximenes hateten, hafoin enkontru ho doadores iha edifisiu East Timor Development Agency (ETDA), Dili.
Nia hateten, iha tempu badak estado Timor–Leste sei ratifika konvensaun internasional kontra trabalho infantil iha Jenebra, tanba ne’e governu iha obrigasaun atu rekoilha dadus sira ne’e atu bele dezenvolve programa hodi responde ba problema trabalho infantil iha rai laran.
Entretantu reprezentante ILO, Roberto Pes rekonese dadus ne’e importante tebes tanba ne’e ILO sei apoiu SEPFOPE hodi halo survey kona ba trabalhadora infantile.
“Ami prontu kapasita no apoiu SEPFOPE hodi prepara dadus ba Jenebra inklui mos dadus trabalho infantil,” nia dehan.
Iha parte seluk, reprezentante sosiedade sivil ne’ebe servisu ba area protesaun labarik, Honorio Almeida, fo apoia tomak ba inisiativa governu atu sentraliza dadus, maibe governu tenke kria politika no asaun konkretu hodi kombate situasaun ne’e laos atu halo deit relatorio ba komite Jenebra.
“Ita la’os hare kuantidade hira mak involve, maibe importante mak governu presiza hanoin intervensaun saida mak ita halo atu elemina situasaun ida ne’e,” nia dehan.
