Rede edukasaun Timor-Leste Coalition for Education preokupa maka’as kona ba attitude labarik sira ne’ebe halimar paixon no bingo durante ferias natal no tinan foun, tanba ida ne’e perigu ba sira nia isin no future.
Koordenador Programa Monitorizasaun no Advokasia Timor-Leste Coalition for Education (TLCE), João Soares R. Pequinho, hateten ida ne’e papel inan aman nian atu eduka labarik sira ho atividade ne’ebe positive.
“La’os husik ba joga bingo no halimar paixon ne’ebe fo perigu ba sira nia isin, diak liu haruka sira ba tuir atividade ne’ebe promove talenta ka kursu ruma,” Koordenador Pequinho preokupa, hafoin aprezenta relatoriu sombra CRC daruak nian iha Tower, Fatuhada, Dili.
Nia rekonese, katak labarik sira feriadu kleur (fulan tolu), ne’e solusaun uniku husi Ministeriu Edukasaun foti hodi kapasita profesores sira durante fulan tolu ne’e, tanba ne’e inan aman iha papel importante atu eduka sira.
Nudar sosiedade sivil ne’ebe servisu iha area edukasaun, TLCE konkorda ho desizaun Ministerio Edukasaun, katak iha fulan sia nia laran professores iha responsabilidade atu eduka labarik sira no fulan tolu inan aman mak toma responsavel hodi eduka sira iha uma.
Preokupasoens hanesan mai mos husi Koordenadora Uma Krese Forum Komunikasaun Feto Timor –Leste (FOKUPERS), Mercia Lopes, tanba inan aman rasik la fo importansia oinsa mak bele oan sira ba atividades ne’ebe positive.
Nia haktuir, inan aman nudar ezemplu ba labarik sira, bainhira inan aman halo atividade ne’ebe negativu (joga karta no seluk tan) konserteza labarik banati tuir.
“Agora ita hare iha fatin barak labarik sira lor-loron mak halimar bingo, pior liu inan aman sira mak halimar uluk,” nia preokupa.
Nia dehan, Krese FOKUPERS iha duni planu atu organiza atividade edukativu iha nivel sukus, halibur labarik sira aprende kreatividade ruma hodi dezenvolve sira nia talentu iha tempu feriadu, maibe la konsege tanba liders komunitaria la koopera.
