Premiada N-Peace feto iha paz no seguransa, Filomena Barros dos Reis, hateten komunikasaun entre membru familia uma laran importante tebes, atu kombate violensia domestika hodi promove paz iha uma laran. 
Nia rekonese, katak ema ida –idak iha karakter ne’ebe la hanesan, maibe komunikasaun, dialogu entre fen-la’en no oan sira ne’e efisensia tebes atu kombate violensia domestika no buka resolve problema ho ulun malirin hodi kontribui ba harii paz no serugransa iha uma laran.
“La’os halimar liman no ain resolve problema. Hau sempre koalia; importante tebes familia uma laran tenke tur hamutuk, karik loron tomak ita labele tur hamutuk tanba servisu, maibe kalan tempu ne’ebe diak atu fahe hanoin balun kona ba atividade ne’ebe halo,” Premiada N-Peace Reis dehan, iha Dili.
Entretantu, N-Peace seluk, Madalena Bidau Soares alias Kasian, hateten problema violensia domestika ne’e problema ne’ebe seriu, tanba ema ida-idak iha nia karakteristiku la hanesan.
Iha kazu balun akontese, tuir nia, tanba fen dependensia liu ba la’en entaun bele mosu situasaun ne’ebe bele fo ameasa bo’ot sira nia familia no uma sai fatin inimigu.
“Nasaun ne’ebe ukun rasik an ona feto no mane tenke brani servisu hodi kontribui ba nasaun, la’os buat hotu-hotu governu fo mak foin halo ne’e,” nia dehan.
