Atu garante sustentabilidade programa merenda eskolar iha eskolas, fo nutrisaun diak ba estudantes, Ministeriu Edukasaun deside sei hasa’e subsidiu kada alunus 25 sentavus kada loron ida.
Vise Ministra Ensino Baziku, Dulce de Jesus Soares, hateten programa merenda la’os deit atu halakon hamlaha no hasa’e kualidade nutrisaun, maibe importante mak alunus sira matenek no iha kapasidade hodi akapta lisaun ne’ebe profesores sira hanorin durante prosesu aprendizajen.
“Iha tinan 2014 atribui ba alunu ida –idak sentavus 25 ba loron ida, nune’e hotu –hotu sei han diak liu no han ekilibradu,” Vise Ministra Soares hateten, bainhira partisipa iha selebrasaun loron mundial ba aihan iha sentru konvensaun Dili.
Nia hatutan, alimentasaun eskolar nudar investimentu importante ida, tanba labarik saudavel ka forte nasaun nia futuru mos forte, la’os kustu ne’ebe mak sei fo retornu no kontributu maka’as ba dezenvolvementu sustentavel ba nasaun Timor –Leste.
Iha parte seluk, Membru Komisaun F (saude, edukasaun, igualidade, veteranus), Deputada Ilda Maria da Conçeicã, hateten osan sentavus 25 ne’e nafatin la sufsiente tanba sei fahe mos ba konzineiru sira.
“Sentavus 25 ne’e, hau hanoin la to’o, diak liu mak sa’e ba iha sentavus 50, tanba tuir menu manual ne’ebe ministerio fo sai osan ne’e sei selu mos ba ema sira tein ne’e, depois ami sei hare,” Deputada da Conceicao dehan.
Antes ne’e organizasaun feto sira ne’ebe hamahon an iha Rede Feto Timor –Leste mos rekomenda ba iha governu no Parlamentu Nasional, liu husi relatorio Kongresu Nasional Feto ba dala IV iha Delta Nova iha fulan Agostu 2013, husu atu hasa’e subsidiu merenda eskolar nian.
