Grupu feto sira husi 13 distritus ne’ebe partisipa feira fiar ne’ebe organiza husi Sekretaria Estado Promosaun Igualidade (SEPI), sente triste tanba durante loron lima laiha vizitantes no sira nia produtu ema la sosa.
Koordenadora Grupu Feto Inan Terus Nain, Adelina Freitas da Costa, hateten durante loron lima ne’e laiha nain ulun ida mak ba sosa sira nia produtu ne’ebe sira fa’an.
“Ami triste tanba vizitante laiha ami nia sasan sira ne’e la folin,” Koordenadora da Costa dehan ho triste, iha Sentru Konvensaun, Dili.
Nia dehan, produtu ne’ebe nia grupu fa’an mak hanesan selendang, karteira, telephone nia fatin halo ho tais, kazaku suku ho tais no seluk tan.
Nia informa, mos katak grupu ne’e harii husi feto faluk nain hitu iha tinan 2008, ho objetivu atu kria rasik empregu ba sira nia an no ba ema seluk atu bele hetan osan liu husi kreatividade ne’ebe sira iha hodi sustenta sira nia moris no familia.
Grupu inan feto ne’e harii hetan kedas apoiu husi Sekretaria Estadu Promosaun Igualidade (SEPI) iha tinan 2008 ho montante $3,000 apoiu ba kapasitasaun membru sira ba area espesifiku hanesan suku.
Sentementu hanesan hato’o husi Koordenadora Grupu Buka Rasik husi distritu Viqueque, Candida Gusmão, no konsidera Timor oan la hadomi sira nia produtu rasik.
“Ami nia sasan ne’e ami lori husi distritu dok mai to iha ne’e maibe ema la sosa tanba ita Timor rasik la kohi sosa ita nia produtu ida ne’e mak halo ami laran triste,” nia dehan.
Tanba ne’e nia sujere ba SEPI, ba futuru organiza tan feira hanesan ne’e, importante mak mobiliza ema hotu liu –liu investor sira iha rai laran no nai ulun sira hanesan membru parlamentu, instituisaun governu atu hola netik “ami nia produtu, se la’e ami mai husi rai do’ok fila mamuk ho laran triste,”
Produtu ne’ebe grupu Buka Rasik faan mak hanesan sanan, buli, bikan halo ho rai mean inklui mos homan biti makerek ne’ebe ho foli $2 ba leten.
Grupu ne’e rasik harii iha tinan 2010 ho nia membru hamutuk nain 10, feto nain sia mane ida. Atividade mak lor-loron halo sanan rai no seluk tan, tanba sanan rai importante tebes atu halo kultura ruma tenke uja sanan rai.
Feira Fiar ne’e realize hodi komemora loron nasional feto bad a-36, iha Sentru Konvensaun Merkadu Lama, Dili.
