Iha monitorizasaun organizasaun Lalenok Ba Ema Hotu (LABEH) durante fulan sia ba servisu instituisaun governu nian, iha instituisaun 13, hetan katak laiha transparansia bainhira institutisaun hirak ne’e hala’o servisu.
Diretor Ezekutivu LABEH, Julio Gil da Silva, fo sai ida ne’e bainhira publika sira nia relatoriu monitorizasaun durante fulan sia (Janeiru-Setembru 2013) ba iha publiku, iha edifisiu LABEH, Kampung Baru, Comoro, Dili.
Nia dehan, relatoriu monitorizasaun LABEH ne’e bazeia ba dadus ne’ebe mak sira hetan. “Kuandu husu dadus kona ba kada projetu, ami iha kompletu,” nia garante.
Durante fulan sia nia laran ne’ebe LABEH monitorija servisu membru governu nian nota katak projeitu ne’ebe mak governu halo tenderijasaun ba kompanha hamutuk 433 projetu, maibe husi numeru ne’e mal jestaun ka laiha transparansia hamutuk 101.
“Ami konsege rekolha dadus kona ba dadus tenderizasaun ninian ba fulan sia nian ne’e hamutuk 433 projetus ne’ebe mak governu hasai,” nia hateten.
Ministeriu hirak ne’ebe mak komete falta transparansia insidente aas liu mak Ministeriu Saude (MS) ho projetu 34, no inklui mos Provedoria dos Direitus Humanus no Justisa (PDHJ) ho kazu ida.
Nia dehan, buat sira ne’e mosu, tanba Diresaun Aprovisionamentu no Prokuramentu la aplika dekretu Lei Aprovisionamentu no Prokuramentu ninian.
Hatan ba kestaun ne’e, Adjunto PDHJ, Silvestre Pinto, katak projetu ida ne’e PDHJ ninian duni, maibe Agensia Dezenvolvementu Nasional (ADN) ho Obras Publiku mak jere.
Nia dehan, Orsamentu Jeral do Estadu (OJE) tama iha PDH ninian duni, maibe nia ezekusaun la’os PDHJ.
“Hau hanoin LABEH sira hanoin kona ba ida ne’e, diak liu sira ba koalia ho ADN ho Ministeriu Finansas mak hatene, sira mak hatene,” nia hateten.
Nia hatutan, edifisiu PDHJ ninian ne’ebe oras ne’e dadauk halo hela iha rejional sira, PDHJ la tau liman.
“Projetu fiziku finalmente ami mak uja, maibe projetu hotu-hotu iha ami nia sede rejional sira, sira administrador sira mak prosesa, depois konstrusaun hotu tiha sira entrega deit,” nia dehan.
Provedor ne’e esplika, edifisiu rejional PDHJ nian ne’e remata no halo inagurasaun laos PDHJ mak inagura maibe husi Ministeriu Estatal mak inagura.
“Ami la inagura maibe ami so simu no uja deit,edifisiu sira ne’e mak horas ne’e dadauk iha Distritu Bobonaro(Maliana),Distritu Same(Manufahi) no Distritu Baucau,”
Wainhira TDW tenta konfirma asuntu ne’e ba iha Diretor ADN Samuel Marcal, maibe la konsege tanba okupadu.
