Organizasaun Judicial System Monitoring Program (JSMP) husu ba Ministeriu Publiku atu akompanha arguidu ne’ebe hetan suspensaun iha tribunal, nune’e bele hatene katak sira la repete tan hahalok ne’ebe sira halo.
Diretor Ezekutivu JSMP, Luis Oliveira Sampaio, hateten durante ne’e laiha instituisaun judisiariu ida mak akompanha arguidu/a sira hafoin hetan suspensaun iha tribunal, maske iha lei Kodigu Prosesu Penal alinea F koalia ona kona ba akompanhamentu.
Nia dehan, iha Kodigu Prosesu Penal alinea F ne’e koalia kona ba funsaun Ministeriu Publiku nian no knar ida mak atu promove ezekusaun kona ba desizaun judisiariu.
“Ba hau nia komprensaun, tanba Ministeriu Publiku hanesan ezekutor ba desizaun tribunal,” Sampaio dehan.
Nia hatutan, mesmu lei la hateten klaru, maibe Ministeriu Publiku (MP) iha obrigasaun atu halo akompanhamentu. “Nia kumpri duni nia dever ga la’e,” nia katak.
Hatan ba kestaun ne’e Prokuradoria Ministeriu Publiku, Angelina Saldanha, katak iha lei la dehan klaru, katak see maka bele halo akompanhamentu ba arguidu/a ne’ebe hetan pena suspensaun.
“La hatene Ministeriu Publiku maka tenke halo akompanhamentu ga sosiadade sivil,” Saldanha dehan.
Maibe kona ba relatoriu wainhira pena atu prolonga tempu suspensaun no fo informasaun, katak arguidu ne’e nia suspensaun atu remata ona, nia dehan, kestaun ne’e sempre la’o no durante ne’e sistema ne’e la’o diak.
“Karik arguidu ne’e komete fali krimi ruma, entaun sei notifika Ministeriu Publiku atu fo informasaun ba tribunal,” Prokurador Saldanha dehan.
Iha fatin hanesan Estudante husi Universidade da Paz (UNPAZ), Fakuldade Direitu, Antonio da Costa hateten, presiza reve ba lei ne’ebe iha, tanba Instituisaun Judisial rasik sei dun malu, se mak iha dever hodi akompanha arguidu suspensaun sira.
