Komisaun F (saude, edukasaun, igualidade no veteranus), bolu atensaun ba iha Ministru Saude atu resolve lalais problema krizi aimoruk iha fasilidade saude hotu inklui Ospital Nasional, tanba ne’e relasiona ho ema nia vida.
Prezidente Komisaun F, Deputadu Virgilio da Costa Hornai, hateten falta aimoruk iha fasilidade saude hotu inklui iha ospital nasional, ne’e perigu bo’ot no bele rezulta ema mate.
Tuir nia, ne’e problema seriu no Ministru Saude tenke toma atensaun lalais, pasiente sira ba ospital fila fali deit, tanba aimoruk laiha.
La’os ne’e deit, nia dehan, armazen Ajensia Servisu Autonomo Medikamentus e Ekipamentus Saude (SAMES) mos mamuk (aimoruk Laiha).
“Komisaun F husu urjente ba Ministru Saude ho Vise atu halo ezersisiu extra oituan iha tempu badak atu kompleta liu husi meus kompras emergensia, tenke ho aviaun labele marina, tanba ita iha osan,” Prezidente Komisaun F ne’e sujere, iha armazen SAMES iha Kampu Alor, Dili.
Entretantu, Diretora Komisaun Temporaria SAMES, Odete Maria Freitas Belo, hateten nia parte labele halo buat ida kona ba falta aimoruk, tanba prosesu aprovizionamentu konsentra hotu iha ministeriu.
Nia hatutan, kona ba stok out aimoruk ne’ebe iha SAMES komisaun temporaria informa ona ba iha ministeriu atu kompras, maibe atraza iha prosesu aprovizionamentu.
“Ita koalia kona ba suply change management tenke iha pakote ida, tenke bazeia ba stok nivel iha SAMES no informasaun husi ministeriu kona ba aimoruk hira mak sira presiza, liu –liu kualifikasaun, foin ita bele halo kompras maibe durante ne’e sevisu pakote ne’e la akontese,” Belo dehan.
Nia afirma, bainhira governu asina akordu ho Kimia Farma iha fulan July 2013 liu ba, SAMES foin simu aimoruk no konsomoves ne’ebe kompania hatama hamutuk kontainer 11, maibe aimoruk iha kontainer ne’e barak liu mak soru been, betadin no konsomoves seluk hanesan luvas .
Diretora ne’e dehan, relatorio stok out ne’ebe komisaun halo iha semana kotuk kuaze aimoruk hamutuk 57% items mak laiha, maibe kompania konsege hatama tan aimoruk entau sei iha 46% items mak laiha.
Iha parte seluk funsionario SAMES ne’ebe lakohi fo sai nia identidade, hateten kontainer sira ne’ebe kompania hatama mai ne’e soru been deit mak container hat no betadin container ida aimoruk oituan deit.
Nia dehan, aimoruk ne’ebe laiha liu iha SAMES items barak hanesan parasetamol, anastesia no aimoruk importante seluk tan inklui mos luvas ne’e ida mos laiha.
Entretantu Vise Ministra Saude, Maria do Céu Sarmento Pina da Costa, rekonese katak aimoruk falta duni iha fasilidade saude, maibe ministeriu sempre halo kompras emergensia.
“Ministeriu saude la toba dukur, la’os lakohi resolve maibe kompras emergensia la’o nafatin,” Vise do Céu.
Nia informa, katak aimoruk kontainer 15 mak paradu iha Surabaya-Indonezia, ministeriu husu atu kompania hatama liu husi aviaun ho kuantidade emergensia deit, tanba imposivel kontainer 15 lima ne’e mai hotu dala ida.
