Membru Parlamentu Nasional sujere ba Ministeriu Obras Publiku atu hadia sistema ne’ebe dadaun ne’e iha, tanba durante ne’e obra barak mak laiha kualidade.
Deputadu Inacio Moreira, hateten presiza muda, tenke iha planu diak, nune’e wainhira halo obra ida ho kualidade.
“Tenke defini didiak, hanesan halo estrada, halo ponte, instala eletrisidade, bee moos. Planu diak mak foin aloka osan, depois identifika bee ne’e liu husi ne’ebe?,” Deputadu Moreira sujere, iha Parlamentu Nasional.
Nia dehan, diak liu tan bainhira halo projetu ida, iha uluk planu no tenke iha estudu de viabilidade.
“Halo dezenu tekniku, tenke iha kalkulasaun, ne’e maka los, durante ne’e sistema hanesan ne’e laiha,” Deputadu husi bankada Fretilin ne’e dehan.
Hatan ba estaun ne’e, Sekretariu Estadu Obras Publiku (SEOP), Luis Vaz Rodrigues, katak agora dadaun halo ona sistema foun, tuir prosedur tekniku funsionariu iha governu nia instituisaun.
“Labele halo dezenu no labele halo BOQ, “ nia hateten.
Nia dehan, sstema foun ne’e, atu halo dezenu, levantamentu de dadus, halo BOQ no halo supervizaun, servisu sira ne’e so konsultan maka bele halo.
Nia informa, wainhira konsultan sira halo ona sira nia servisu, konsultan halo pedidu mai iha Ministeriu Obras Publik (MOP) ho Agensia Dezemvolvementu Nasional (ADN) hodi tun halo inspesaun konjunta.
“Inspensaun direita ba dezenu ne’ebe konsultan halo no ba konstruksaun ne’ebe mak konsultan supervisiona, kuandu konsultan mak salah, entaun tama kadeia,” dehan SE Rodrigues.
Sistema ne’ebe la’o durante ne’e, nia dehan, mak dezenu no BOQ, ne’e hala’o husi funsionariu MOP nian.
“Konflitu ne’ebe mosu durante ne’e barak liu entre kompania ho governu, la’os governu ho konsultan, tanba ita ignora tiha konsultan nia servisu, tanba ne’e mak agora ita monta konsulta ida iha distritus,” SE hateten.
