Membru Parlamentu Nasional sujere ba Ministeriu Obras Publiku (MOP) atu halo ponte ida ba iha komunidade sira iha suku Samalari ne’ebe liga ba suku Buibau, ditritu Baucau.
Deputada Anna Ribeiru da Concencao, hateten ida ne’e ejizensia husi komunidade sira bainhira sira nia komisaun ba halo fiskalizasaun iha suku ne’eba.
“Xefe Suku Samalari mak husu atu tau mos ponte entre Samalari ho Buibau, atu nune’e bele benefisia komunidade iha suku rua ne’e.,” Deputada Ribeiro dehan.
La’os deit ba suku rua ne’e, maibe nia dehan, ponte ne’e sei fo benefisiu ba iha komunidade suku Quelicai, e mos liu husi Samalari ba iha distritu Viqueque besik liu.
Hatan ba kestaun ne’e Sekretariu Estadu Obras Publiku (SEOP), Luis Vaz Rodrigues, katak asuntu ne’e tama ona iha planu Ministeriu Obras Publiku nian.
“Oinsa para ita bele korta deit dalan ne’e hodi sai iha Watulari, ida ne’e asesu dalan diak ida,” SE Rodrigues dehan.
Alem de ne’e, nia dehan, aban bainrua kuandu governu nia mega projetu ba mina ne’e kompletu ona, hanesan husi Beaco ba Suai, sei fasilita ema barak husi Watulari mai to’o Dili ne’e fasil no besik liu tan.
“Durante ne’e ita liu husi Baucau, Venilale buat sira ne’e kulpa bo’ot ida, mais ita husi Samalari ne’e ita to’o lalais iha Watulari, ida ne’e tama ona planu,” nia dehan.
