Organizasaun Conselho Nasional Joventude Timor-Leste, sei loke kursu lian Ingles ba joventude iha bairo ne’ebe kategori risku ba konflitu, iha Dili laran.
Prezidente Conselho Nasional Joventude Timor-Leste (CNJTL), Leovigildo Hornai, hateten dadaun halo hela kordenasaun ho governu kona ba asuntu ne’e, hodi kapasita no enkoraja joven sira atu partisipa iha prosesu dezenvolvementu.
Nia dehan, hanoin taka artemarsiais balun importante mak loke kursu ruma ba joventude sira atu sira bele aprende siensia ruma no espresa sira nia kreatividade positive ruma ba sira nia moris.
Lideransa joventude ne’e dehan, atividade fahe ekipamentus desportu, musika no halo seminar ho joventude sira iha bairo ne’e diak, maibe la efetivu sira presiza aprende buat ruma no espresa sira nia kreatividade.
“La’os deit atu komprende lingua, maibe iha buat barak mak sei intrudus ba sira liu –liu atividade kreativu ruma hodi dezenvolve sira nia sukus, no la depende ba governu,” Prezidente CNJTL ne’e dehan, iha farol, Dili.
Nia informa, katak iha fulan hirak liu ba sira lansa ona kursu lian Ingles iha suku Bairo-Pite parte Kakaulidun, atu bele halibur joventude sira iha bairo ne’eba no sei ba fali bairo seluk hanesan Luru-Mata, Fatuhada, Marconi, Beto, Bebonuk no Becora ne’ebe kategori risku ba konflitu.
Nia hatutan, programa ne’e sei la’o atrazu oituan tanba CNJTL laiha orsamentu ne’ebe permanente no sufsente atu realize hotu iha bairo –bairo tanba voluntario sira presiza osan oituan ba sira nia transprote.
Tanba ne’e nia husu ba joventude sira hotu iha rai doben ida ne’e, atu labele tane liman ba governu maibe servisu maka’as, badinas hodi muda sira nia moris tanba governu labele muda ema ida nia moris.
Iha parte seluk, joventude Comoro, Martinho Pinto, sente kontente ho programa ida ne’e, maibe la garantia katak bainhira atividade sira ne’e lao ona sei la mosu konflitu tanba relasiona ho ema nia mentalidade.
“Hau apresia ho planu ne’e tanba durante ne’e laiha aktividade ruma atu halibur foinsa’e sira hamutuk entau ho programa ida ne’e bele halibur foinsa’e sira hamutuk hodi troka hanoin alende aprende lingua,”nia dehan.
