Prezidente Camara do Comersio e Industria Timor –Leste (CCI-TL), Julio Alvaro, hateten oras ne’e dadaun sira estabelese ona sentru inkubadora hodi fo kapasitasaun no akompanhamentu ba foinsa’e sira ne’ebe iha hanoin atu hahu negosiu. 
Nia dehan, programa ida ne’e hanesan faze primeiru CCI-TL hala’o hodi identifika jovens sira nia hakarak no akompanha, enkoraja sira atu partisipa iha prosesu dezenvolvementu tuir mehi ne’ebe sira iha, tanba atu sai emprezario diak, tenke iha boa vontade.
Sentru inkubadora ne’e, nia dehan, halibur foinsa’e sira hotu ne’ebe iha hanoin hahu negosiu atu bele hetan akompanhamentu husi peritu sira, no sei hetan motivasaun no akompanhamentu husi emprezariu susesu sira iha rai laran no liur durante tinan ida nia laran.
“Sentru ne’e joven sira sei hetan akompaniamentu husi espesialista sira kona ba aktividade ne’ebe sira hakarak halao liu –liu area ne’ebe sira eskoilha, tanba durante ne’e sira iha hanoin maibe sira sente mesak entaun difisil,” Prezidente CCI-TL , Alvaro hateten bainhira lansa sentru inkubadora iha Acait, Dili.
Nia hatutan, partisipante sira sei hetan sertifikadu no apoia fundus husi governu atu hahu implementa tipu negosiu ne’ebe sira eskoilha.
Nia informa, katak CCI-TL liu husi apoia doadores internasional sira, promete sei nafatin hakiak programa inovasaun ne’e iha futuru hodi prepara joven sira sai ema ne’ebe kreativu kria servisu ba sira nia an rasik no ba foinsa’e sira seluk.
Sentru ne’e sei simu foinsa’e sira hotu ne’ebe iha hanoin atu involve an iha vida negosio no sei laiha limitasaun maibe ba foinsa’e hotu bele partisipa. Nia inskrisaun sei hahu iha fulan ida ne’e nia laran to’o fulan Dezembru tinan ida ne’e.
Entretantu, Sekretariu Estadu Apoiu no Promosaun ba Setor Privadu, Veneranda Lemos, hateten Timor –Leste nudar nasaun foun, presiza duni iha sentru inkubadora negosiu ida atu prepara foinsa’e sira ho diak atu investe iha rai laran.
Tanba ne’e nia husu ba CCI-TL, atu kolabora ho instituisaun IADE atu dezenvolve programa ne’e sai diak liu tan, hodi prepara foinsa’e sira iha futuru tanba sira mos iha programa ne’ebe hanesan.
“Ami sei fasilita no fo fundus ba joven empregador sira no sira ne’ebe komesa dadauk ona ita bele fo fundus ba sira, atu lori sira nia hanoin negosiu diak ba oin,” SE Lemos dehan.
Iha parte seluk,joventude Mateus Lima Soares, sente orgulho no apresia tebes tanba ne’e hanesan primeira vez CCI-TL ho governu realize hodi fo oportunidade ba foinsa’e sira atu partisipa iha prosesu dezenvolvementu rai laran.
“Faze ida hanesan ne’e loke ona oportunidade ba joventude tomak ne’ebe iha ona kapasidade no kreatividade diak bele loke negosio rasik hodi emprega sira nia an duke tara an ba governu,” dehan Estudantes Institutu Of Busnies (IOB) ne’e.
